Hăng 135 boh sang anŏ, djuai ania ƀiă Jeh-Triêng ƀơi plơi Dục Nhầy 1, să guai dêh čar Đăk Dục, tơring glông Ngọc Hồi, tơring čar Kon Tum, jing ƀing khua, tơhan pơgang guai Dục Nông kar hăng adơi ayong amăng sang yơh. Ayong A Luật, sa čô mơnuih amăng plơi brơi thâo: Mơnuih ƀôn sang lêng kơ khăp ƀu-eng lơ̆m lăi nao ƀing khua, tơhan pơgang guai.

“Puih kơđông tơhan lăng ba hơdôm boh sang anŏ tơnap tap. Djru ba ƀing gơñu, giong anun čem rông ba ƀing čơđai drit droai. Lêng kơ lăng ba tơlơi hơdip neh met wa pơ să Đăk Dục. Kâo lăng ƀing tơhan pơgang guai pơ anai jê̆ giăm hăng ană plơi biă”.

3 thun rơgao, Anom git gai tơhan pơgang guai Dục Nông pơkiăo nao Thiếu tá Dương Văn Lương nao mă bruă pơ Grup ping gah plơi, pơtrut tui pran jua, tơlơi gơgrong bruă mơ̆ng mơnuih ngă tơhan pơgang guai hăng Ping gah, Mơnuih ƀôn sang. Yă Xiêng Thị Túy, khua grup ping gah, khua plơi Dục Nhầy 1 brơi thâo Thiếu tá Dương Văn Lương lăi pơthâo kơ Anom bruă ba tơbiă Tơlơi pơtrun klă, pơplih phrâo amăng bruă akŏ pơdong Ping gah hăng pơđĭ tui tơlơi hơdip mơnuih ƀôn sang pơ anai. Mơ̆ng akŏ rơwang bruă truh ră anai Grup ping gah plơi Dục Nhầy 1 hơmâo pơmut thim 2 čô mơnuih ping gah phrâo, pơđĭ tui mrô mơnuih ping gah amăng plơi jing 19 čô, mrô sang anŏ rin amăng plơi trun, dŏ glăi 6 boh sang anŏ laih:“Ayong Dương Văn Lương ngă bruă hur har, pơgôp hiăp djru Grup ping gah čih pơkra hơdră ngă bruă wơ̆t hăng Tơlơi pơtrun mơ̆ng Grup ping gah, bruă jơnum hơmâo lu tơlơi phara hloh, pơhưč mơnuih ping gah nao jơnum. Rơngiao kơ hơdôm bruă anun, ayong Lương ăt djru ba neh met wa, ling tơhan hăng mơnuih ƀôn sang pơlir hơbit jê̆ giăm hloh. Mơ̆ng hrơi hơmâo tơhan nao jơnum pơ Grup ping gah jing plơi anai klă hloh, mă bruă kjăp, ƀu hơmâo sang anŏ ngă soh tơlơi phiăn”.

Hruă kjăp hloh tơlơi khăp ƀu-eng tơhan hăng mơnuih ƀôn sang, akŏ pơdong ană plơi wai pơgang lŏn ia kjăp phik, mơ̆ng thun 2020 truh ră anai, Anom bruă git gai tơhan pơgang guai tơring čar Kon Tum hơmâo pơkiăo nao lu tơhan apăn bruă mơ̆ng hơdôm Puih kơđông pơgang guai kơ 13/13 boh să ƀơi guai dêh čar giăm Lao hăng Kur. Amăng anun, hơmâo 4 čô khua Puih kơđông tơhan ngă bruă pơ Ping gah 4 boh tơring glông; 13 čô khua ngă bruă pơ ping gah 13 boh să; 17 čô khua hơmâo ruah amăng Jơnum min pơ ala mơnuih ƀôn sang tơring čar, tơring glông, să...

Trung tá A Ngọc Chiến, Puih kơđông pơgang guai Đăk Nhoong hơmâo Anom bruă git gai tơhan pơgang guai tơring čar Kon Tum jao bruă ngă Kơ-iăng khua ping gah, Khua jơnum min pel ĕp kơđi tơlơi să Đăk Nhoong, tơring glông Đăk Glei, tơring čar Kon Tum brơi thâo, hrŏm hăng ping gah hơmâo kjăp, akŏ pơdong Ping gah kjăp kơtang, ñu lêng kơ pơmin bruă djru mơnuih ƀôn sang lui hĭ tơlơi phiăn ƀu hiam mơ̆ng đưm, laih anun pơplih tơlơi bơwih ƀong pơđĭ tui tơlơi hơdip mơda:“Kâo lăi pơthâo kơ Ping gah să ba tơbiă Tơlơi pơtrun git gai črâo bruă Jơnum min mơnuih ƀôn sang, Jơnum min djŏp djuai ania mơnuih mơnam hăng hơdôm khul grup gum hrŏm ngă bruă, git gai lăng glăi abih hơbô̆ bruă pơđĭ kyar bơwih ƀong huă, biă ñu lĕ lui hĭ tơlơi phiăn ƀu hiam mơ̆ng đưm kiăng mơnuih ƀôn sang djuai ƀiă hrưn đĭ tơbiă đuăi mơ̆ng rin rơpa. Jing să ƀơi guai dêh čar, kual glai pơgang tơlơi truh lŏn adai ngă, gơmơi pơsit pla phun jrao akha, yôm hloh lĕ sâm Ngọc Linh, dua lĕ gơmơi amra pla bơmao Linh chi kiăng hơmâo prăk lu”.

Amăng hơdôm thun rơgao hăng pran jua “Puih kơđông jing sang, guai jing plơi pla, mơnuih ƀôn sang djŏp djuai ania jing adơi ayong pô”, tơhan pơgang guai tơring čar Kon Tum hơmâo lu bruă ngă sit nik ngă kjăp tui tơlơi khăp ƀu-eng tơhan hăng mơnuih ƀôn sang pơ guai dêh čar. Hmư̆ hing kah hăng hơbô̆ bruă “Akŏ pơdong plơi Đăk Ga, să Đăk Nhoong tơring glông Đăk Glei trơi pơđao, kjăp kơtang, rơnuk rơnua”; hơdôm bruă djru mơnuih ƀôn sang kah hăng: Sang măi pơkra apui lơtrik anet Đăk Giao/Đăk Long; ia yua hơdjă rô mă hơjăn Bờ Y, Đăk Long, Đăk Blô; hơbô̆ bruă ngă giăng mah hăng hơdôm boh sang anŏ tơnap tap kiăng hrưn đĭ huăi rin rơpa; djru ba 74 čô ană amon amăng jơlan hơdră “Čung ba čơđai nao pơ sang hră”; 15 čô ană rông Puih kơđông tơhan...

Mơ̆ng bruă gum hrŏm, djru ba mơ̆ng ƀing khua, tơhan pơgang guai, truh ră anai hơmâo laih 7 amăng mrô 13 boh să guai dêh čar tơring čar Kon Tum dưi pơsit jing plơi pla phrâo. Hrŏm hăng anun lĕ tơlơi hơdip mơnuih ƀôn sang pơ guai dêh čar mơ̆ng tơring čar Kon Tum glăk jai hrơi pơplih, mơnuih ƀôn sang đăo kơnang kơ kơnuk kơna jai hrơi kjăp phik hloh./.