Ñu rơkâo djop Ding jum, gơnong bruă, ƀon lan hruă kjăp ƀiă dong “Tlâo tơlơi pơplih prong”, lăp djơ̆ hăng gru grua mơnuih mơnam ngă pô Việt Nam amăng rơwang phrâo. Anai lĕ pơplih mơng tơlơi pơmĭn lăng gru grua lĕ bruă pơđĭ kyar hơdai nao pơsit tong gru grua lĕ atur phun kơ pran jua amăng mơnuih mơnam; pơplih mơng anih gru grua đưm hơdai nao pơđĭ kyar gru grua amăng tơlơi hơdip sit nik hăng amăng plang internet; pơplih mơng tơlơi pơmĭn djă pioh lĕ phun hơdai nao pơlir kjăp kơplah wah djă pioh hăng pơčeh phrâo.

Khua git gai Ping gah, Khua mir sir lăi rơđah, pơtrut kơtang bruă pơjing tơlơi ngă pô gru grua amăng plang internet hrưn đĭ pran pơhưč, bruă ngă lar hyu hăng wai pơgang hơdôm tơlơi yôm gru grua Việt Nam. Amăng plang internet, tơlơi tơkuh nao rai, tŏ tui pơplih phrâo lĕ bruă amra ƀuh, ngă gêh gal kiăng Việt Nam tŭ mă hơdôm anŏ yôm gru grua ană mơnuih, samơ̆ ăt ba tơbiă tơlơi rơkâo kiăng ngă anun lĕ pran gơgrong mă pô, hơmâo jơlan gah ngă bruă hăng tơlơi pơgang djă pioh gru grua djuai anai.