Samơ̆ 5 blan laih rơgao, tơring glông ăt khom tơguan mơn tơring čar lông lăng pơdơi hă ƀu pơdơi. Lom anun, ƀơi črăn ia krông anai hơdôm bôh ƀăt tô song ăt dô̆ hơnong mơn mă čuah amăng tơlơi bơngot mơng mơnuih ƀôn sang lom lŏn ngă đang hmua ƀơƀrư̆ rơngiă tui.

Mơguah lơ 4/3 hăng čơtlăm 8/3, ƀing gơmơi ƀuh ƀô̆ ƀơi kual mă čuah ƀơi ia krông Krông Nô, črăn ia rô găn să Quảng Phú, tơring glông Krông Nô, tơring čar Daknông. Ƀơi črăn ia krông kơnong kơ rơbêh kơ 2 km, hmâo 6 bôh ƀat tô song hrip mă čuah. Sa dua mrô ƀat tô glăk hrĭp mă čuah ƀơi ia krông, čuah ƀôp đĭ amăng dlông ƀat tô. Ƀơi kual dưi hmâo Jơnum min mơnuih ƀôn sang tơring čar Daknông pơsit brơi hơdôm bôh anom bơwih ƀong mă čuah, lu anih glăk tơhlom trun mut dơlăm ƀơi hang ia krông, ngă ia krông pơplih anih rô, samơ̆ ƀat tô ăt hrip mă mơn čuah ik ăk. Sa čô mơnuih ƀôn sang ƀơi plơi Phú Lợi, să Quảng Phú bơngot brơi thâo, bruă mă čuah amăng hơdôm thun jê̆ hăng anai hmâo ngă laih tơlơi lŏn tơhlom jai hrơi jai kơtang tui, ngă rơngiă lu lŏn ngă đang hmua:

 “Lăi hrom ƀơi anai phrâo 5 mông mơguah lĕ gơñu hrĭp mă laih, gơñu hrip mă truh 6-7 mông mơmot kah hăng mơng pơdơi. Hmâo pô lĕ gơñu hrĭp bĕ gah rơngiao ƀiă, bơ̆ ƀu hmâo pô lĕ gơñu ba mut đing hrĭp mă giăm ƀơi hang ia mơtăm, anun lŏn tơhroh pơhlom truh. Anun, kah hăng ih ƀuh gah kơdih, ră anai ñu dưm đing mut amăng anun, sit biă ñu amăng 2 hrơi đôč lŏn ƀơi anun amra tơhlom trun mơtăm yơh. Gong gai plơi pla khom ĕp hơdră hơkrŭ pơsir hiưm hơpă đôč wŏ, bơ̆ pioh tui anai lŏn ngă đang hmua amra lê̆ trun amăng ia krông abih”.

Ơi Nguyễn Chung Huy, Khua Anom bruă kông ngăn dlai tlô hăng rơhuông adai lŏn mơnai tơring glông Krông Nô, tơring čar Daknông brơi thâo, tơlơi lŏn tơhlom ia krông Krông Nô gah să Quảng Phú jai hrơi jai jing kơtang ƀơi hơdôm anih anom bơwih ƀong dưi pơsit brơi mă čuah. Tui mrô yap truh rơnuč thun 2022, hmâo 28 bôh sang anô̆ mơnuih ƀôn sang ƀơi să Quảng Phú răm rai gah lŏn ngă đang hmua, phun pla yua lŏn tơhlom ƀơi hơdôm črăn ia krông pơsit brơi 3 bôh anom bơwih ƀong mă čuah anun lĕ: Hơdôm bôh sang anô̆ mơnuih ƀôn sang hmâo ngă hră rơkâo mơ-ĭt kơ Jơnum min mơnuih ƀôn sang să Quảng Phú hăng ră anai gong gai glăk gơgrong ngă gŏng jơlan kiăng anom bơwih ƀong hmâo tơlơi pơkôl hăng hơdôm bôh sang anô̆ tơlơi pơ ala glăi. Ơi Nguyễn Chung Huy lăi lĕ, bruă mă čuah ră anai ƀu gal ôh, tơlơi lŏn tơhlom ba truh tơlơi ƀom kiơng, glêh tơnap biă. Ơi Huy ăt pơtŏng sit mơn, hơdôm črăn ia krông dưi hmâo Jơnum min mơnuih ƀôn sang tơring čar Daknông pơsit brơi mă čuah kơ hơdôm anom bơwih ƀong blung a ƀu hmâo lŏn tơhlom ôh. Tui tơlơi pơkă, anom bơwih ƀong dưi mă čuh ataih mơng hang ia 20m, samơ̆ ƀu gal ƀơi anô̆ ƀu pơkă rơđah ôh ataih 20 m hang ia krông blung a pơsit hră brơi mă ƀudah ƀơi hơdôm tal. Ba truh bruă lŏn tơhlom jai hrơi jai kơtang lĕ hơdôm bôh ƀat tô hrĭp mă čuah anăp nao dơlăm hloh amăng anih hang ia krông hơđăp. Ră anai, sa dua anih anom lŏn tơhlom laih hơdôm pluh met, ƀat tô song amra glăk mă yua mut dơlăm amăng anih hang ia krông hlâo adih. Hăng anai lĕ tơlơi phiăn hmâo ba ơtbiă kơ hơdôm gơnong bruă hăng Jơnum min mơnuih ƀôn sang tơring čar Daknông pel ĕp kiăng pơplih pơkra:

 “Rơwang hră pơsit brơi mă čuah blung a, anih rơnuč, rơngiao kơ anun tui akô̆ bruă pơkă mă čuah ataih mơng hang ia 20m. Akô̆ bruă mă čuah lĕ tui anun bơ̆ hang ia pơ̆ hơpă lĕ sa tơlơi prong biă, tui hluai rim anih anom, glăk hmâo tơlơi gun ƀơi anai. Tơring glông ăt lu wot mơn hmâo rơkâo pel ĕp hiưm hơpă, tơlơi pơmin lĕ hang ia lom pơsit tơlơi pơsit hră, ƀu djơ̆ lom lŏn tơhlom laih hlơi pô pơdah hang ia pơ̆ hơpă hă jing sa tơlơi prong amăng tơlơi phiăn”.

Hrom hăng anun, hăng tơlơi lŏn tơhlom kơtang, blan 11/2022, Jơnum min mơnuih ƀôn sang tơring glông Krông Nô hmâo laih hră pơ-ar rơkâo Jơnum min mơnuih ƀôn sang tơring čar Daknông pơdơi jăng jai bruă mă čuah ƀơi hơdôm bôh anih anom lŏn tơhlom ƀơi să Quảng Phú. Khă hnun hai, tơring glông tơguan tơring čar mơng anun truh kơ ră anai, lom anun lŏn tơhlom pơphun ngă rim hrơi:

 “Hăng tơlơi lŏn tơhlom rôk tui ia krông Krông Nô lĕ tơring glông ăt hmâo laih sa dua tơlơi rơkâo, ba tơbiă, rơkâo hơdôm anom mă čuah tañ pơjing hăng ngă giong jơlan gah pơplih pơkra, hơkrŭ glăi anih anom amăng bruă mă čuah kiăng mơ-ĭt kơ hơdôm ƀirô hmâo tơlơi dưi pel ĕp, pơsit hăng tŭ ư ngă tui. Rơkâo Gơnong bruă kông ngăn dlai tlô hăng rơhuông adai lŏn mơnai tơring čar pel ĕp, pơsit glăi tơlơi hmâo lŏn tơhlom ƀơi hang ia krông. Ba tơbiă pơdơi jăng jai mă čuah tui tơlơi pơkă amăng Tơlơi pơtrun pơkă mrô 23 mơng Kơnuk kơna. Iâu lĕ kom jăng jai kiăng hơkrŭ glăi anih anom, tơdơi kơ hơkrŭ glăi giong lĕ dưi mă glăi čuah dong. Tơring glông rơkâo laih anun dô̆ tơlơi dưi mơng tơring čar pơsit hiưm hơpă, truh rơnoh hơpă đô̆č”.

Ƀơi ia krông Krông Nô gah să Quảng Phú, tơring glông Krông Nô, Jơnum min mơnuih ƀôn sang tơring čar Daknông pơsit brơi 4 pok hră mă čuah brơi 4 bôh anom bơwih ƀong anun lĕ: Sang bruă bơwih ƀong mơnuih ƀôn sang sa ding kơna mă čuah Phước Lộc, Anom bơwih ƀong mơnuih ƀôn sang Văn Hồng, Sang bruă bơwih ƀong mơnuih ƀôn sang sa ding kơna mă čuah bôh pơtâo Quảng Phú hăng Sang bruă bơwih ƀong mơnuih ƀôn sang sa ding kơna Hải Khánh Ngân. Amăng anun, Sang bruă bơwih ƀong mơnuih ƀôn sang sa ding kơna Hải Khánh Ngân hmâo pơdơi laih bruă mă mơng blan 1/2022. 3 bôh anom bơwih ƀong dô̆ mă bruă dưi pơsit hră mă čuah abih bang rơnoh 68.000 m3 sa thun ƀơi abih bang rơwang ia krông ataih 6,4km.

Hăng tơlơi lŏn tơhlom ngă kơtang tui ƀơi să Quảng Phú, bruă pơdơi jăng jai mă čuah kiăng ngă tui hơdôm bruă pơgang hang ia krông, hơkrŭ glăi anih anom tui Tơlơi pơtrun pơkă 23 mơng Kơnuk kơna hăng tui tơlơi ba tơbiă mơng tơring glông Krông Nô lĕ lăp djơ̆ biă. Jơnum min mơnuih ƀôn sang tơring čar Daknông khom tañ hmâo tơlơi pơsit, bĕ lŏn tơhlom ngă, pơrai hĭ ia krông Krông Nô ăt kah hăng ngă rơngiă lŏn ngă đang hmua mơng mơnuih ƀôn sang./.