Jơlan hơdră yua kơ Khul hlăk ai tơring čar, Khul pơlir hơbit hlăk ai Việt Nam tơring čar Gia Lai gum hrŏm hăng Khul pơlir hơbit hlăk ia dêh čar Việt Nam quận 12, ƀôn prong Hồ Chí Minh pơphun. Ƀơi Sang hră gưl sa Võ Văn Kiệt, să Ia Dơk, tơring glông Đức Cơ, tơlơi dik dăk hăng Hrơi jơnum ngui čơđai muai pioh kơ ƀing čơđai anet.

Grŭp pơphun bruă hmâo ƀơk lu anung gơnam sit nik kah hăng: ring bruă pơkra glăi sang dô̆ gum hrŏm hơbit kơ sang anô̆ tơnap tap, jao 1.000 sop hră čih kơ Khul hlăk ai tơring glông Đức Cơ pioh ngă tui Jơlan hơdră "Yua kơ ƀing čơđai kiăng khăp", 5 anung prăk djru hrăm hră kơ čơđai sang hră yak rơgao tơlơi tơnap hrăm hră rơgơi hăng 20 anung gơnam brơi kơ čơđai sang hră tơnap tap. Ƀơi să guai dêh čar Ia Dom, jơlan hơdră hmâo ba truh laih lu bruă mă sit nik: ƀơk 400 blah khăn gru lŏn ia, 30 kơthung ia tơsâo rơmô kơ čơđai muai, 50 anung gơnam kơ sang anô̆ tơnap tap hăng pok pơhai ring bruă “Ngă bơngač jơlan guai dêh čar”. Hrŏm hăng anun, 200 čô mơnuih ƀôn sang dưi pel ĕp pơjrao tơlơi ruă brơi đôč./.