Ră anai, jơlan nao rai kual Tong Krah - Dap Kơdư ƀơ ƀrư̆ hơmâo tuh pơ alin, biă ñu hơdôm glông jơlan rơdêh đuăi hmar Kơdư - Dơnung hăng hơdôm glông jơlan pơtruh Ngŏ - Yŭ plah wah Dap Kơdư hăng ter hang ia rơsĭ. Lu kơčăo bruă glăk hơmâo ngă kah hăng Quy Nhơn - Pleiku, Khánh Hoà - Buôn Ma Thuột, Gia Nghĩa - Chơn Thành...čang rơmang pok rai anih đĭ kyar, plai ƀiă rơngiă mông nao rao laih anun gêh găl kơ bruă čơkă tuai, logistics, sĭ mơdrô.

Khă hnun, tui hăng ƀing khua, tuh pơ alin man pơkra anih anom, jơlan glông ƀu pơdơi dơ̆ bruă pơtruh tơkuh jơlan đôč ôh. Tơlơi yom hloh lĕ khŏm pơjing anih pơtruh abih bang plah wah plơi prong, tơdrun ia rơsĭ, tơdron rơdêh por, bah amăng jang, logistics hăng hơdôm anih hyu ngui. Ơi Nguyễn Trùng Khánh, Khua anom bruă čơkă tuai hyu ngui Dêh čar Việt Nam brơi thâo, jơlan nao rai jing tơlơi yom phun mơ̆ng dưi mă yua abih anŏ yom mơ̆ng bruă hyu ngui: “Kâo pơmin bruă yom akŏ phun lĕ khŏm hơmâo jơlan nao rai hiam, tơdah ƀu pơtruh jơlan lĕ hơdôm anih čuă ngui mah hơmâo kông ngăn yơyom, ngă pơhưč mơnuih mơnam samơ̆ ƀu dưi ba glăi nua yom ôh, ƀu dưi đĭ kyar djơ̆ hăng anŏ hơmâo. Lăi nao jơlan lĕ ƀu djơ̆ lăi nao jơlan đôč ôh, ăt lăi nao anih anom jơlan glông pơ hơdôm anih čuă ngui, hnun kah mơ̆ng pơjing rai anŏ yom kiăng tuai hyu ĕp, sem lăng, pơđĭ tui anŏ klă anih čuă ngui, dưi pơhno hăng anih pơkŏn”.

Ƀơi mông jơnum, hơdôm anom bruă wai lăng, tơring čar hăng sang bruă mơdrô ăt pơčrông mơn bruă tuh pơ alin, iâu pơthưr abih bang gum ngă, đĭ kyar logistics, pơkra jơlan ƀơi hơdôm anih čuă ngui, hăng ngă hrŏm plah wah hơdôm boh tơring kjăp hloh. Tơlơi djơ̆ hrŏm lĕ khŏm pơplih tơlơi pơmin đĭ kyar čơkă tuai kiăo tui tơring čar, plơi pla đôč jing hơdai đĭ kyar tui anŏ djơ̆ hrŏm gah anih anom, lŏn tơnah, ayuh hyiăng, djŏp mơta ra mơnŏng hiam.

Hăng Gia Lai, tơdơi kơ pơmut hrŏm, ia rơsĭ hăng dap kơdư, tơring čar gêh găl či pơjing bruă čơkă tuai tui glông “ia rơsĭ - lŏn dăo - dap kơdư - glai čư̆”. Kơ-iăng khua jơnum min mơnuih ƀôn sang tơring čar Gia Lai yă Nguyễn Thị Thanh Lịch lăi, tuh pơ alin jơlan nao rai pơtruh lu kual jing pơtrut đĭ kyar brơi wơ̆t kual Tong Krah - Dap Kơdư mơtăm, ƀrô dưi đĭ kyar 2 mrô mơ̆ng rim boh tơring pơ anăp anai: “Lơm pok prong anih anom phrâo, amăng anun hơmâo anih čơkă tuai, ƀu kơnong Gia Lai đĭ kyar 2 mrô đôč ôh, hơdôm boh tơring čar ƀôn prong ăt pơhlom đĭ kyar hrŏm mơn”./.