Ƀơi mông jơnum, ƀing khua hmư̆ 6 pok hră pơtrun laih anun hơmâo ngă rơđah hơdôm tơlơi akŏ phun, hơdôm tơlơi phrâo hơmâo amăng Hră pơtrun, Tơlơi pơčrâo mơ̆ng Ding jum kơđi čar, laih dong ngă dlăm tui hơdôm tơlơi kiăo tui rim bruă mă. Pơhiăp ƀơi mông jơnum, Khua ping gah, Khua mir sir ơi Tô Lâm lăi rơđah, wơ̆t 6 pok hră pơtrun črâo rơđah laih tơlơi kiăng ngă; tơlơi yom hloh lĕ ta ngă hiưm pă hăng tơlơi gơgrong mơ̆ng ƀing apăn akŏ. Rim pok hră pơ-ar pơtrun rai khŏm ngă jing bruă rơđah rơđông, hơmâo pô glăm ba, hơmâo pơsit hăng boh tŭ yua; tuč rơnuč ngă hiưm pă kiăng lŏn ia kjăp kơtang hloh, mơnuih ƀôn sang hơdip klă hloh, đăo kơnang kjăp hloh.

Khua ping gah, Khua mir sir lăi rơđah, 6 pok hră anai anăp nao tơlơi rơgơi mơ̆ng ƀing khua, mơnuih apăn akŏ, pran ngă bruă kơtang mơ̆ng Ping gah, hơmâo khul khua nao hlâo, ba kru, khin ngă khin gơgrong; wai lăng djơ̆; dăp glăi anih đĭ kyar; ba bruă čơkă tuai hyu ngui jing tơlơi gêh găl đĭ kyar bơwih ƀong, pơtrut djŏp anŏ hơmâo mơ̆ng djuai ania ta. Khua ping gah, Khua mir sir kiăng, tơdơi kơ mông Jơnum, djŏp gưl ping gah, anom bruă čar, pô khua khŏm thâo bruă hơget yom phun; jao bruă djơ̆ pô, dưi pơsir, hơmâo djŏp mơnuih či ngă bruă; gơnam pơkra rai khŏm ƀuh rơđah, hrơi mông pơkra khŏm rơđah, pô hlơi gơgrong khŏm thâo rơđah mơn./.