Pioh prăp rơmet lui kơ Mông jơnum djop anom bruă pơdjơ̆ nao pơphun dăp hơdră, truh ră anai hơmâo tŭ mă 70 mơta tơlơi čih pơthâo. Boh yôm phun hơdôm hră čih lăi pơthâo anun, ngă pơrơđah tui jơlan hơdră hăng tơlơi git gai mơ̆ng ping gah amăng tal blah ngă hăng ayăt Prang, boh nik ñu tơlơi pơmin ƀuh mơ̆ng Ping gah, Khua mir sir Hồ Chí Minh, Khua git gai ping gah ling tơhan dêh čar, Ding jum ling tơhan hăng bruă prăp rơmet tal kơsung blah mơ̆ng ling tơhan hăng mơnuih ƀôn sang dêh čar ta mut nao kơsung blah ƀơi Điện Biên Phủ thun 1954. Kơsem min kiăng thâo tong ten bruă prăp lui blah, yua hơgĕt ba truh dưi hĭ, boh tŭ yua yôm djă pioh amăng gru phun hăng hơdôm tơlơi hrăm tui mơ̆ng tal blah dưi ƀơi Điện Biên Phủ.

Jơnum bơkơtuai boh thâo anai, amra pơphun amăng lơ 27/3/2024, kiăng pơđĭ tui tơlơi thâo hluh mơ̆ng khua mua, ƀing nai pơtô, mơnuih hrăm bruă kơđi čar, mơnuih mă bruă, ling tơhan amăng sang hră Kơđi čar, Ding jum ling tơhan laih anun djru kơ ƀing ngă bruă čih pioh amăng hơdrôm hră gru phun ping gah, sang hră kơđi čar dêh čar djă anăn Hồ Chí Minh hăng Hră pơhing ling tơhan amăng bruă man pơdong hăng pơgang lŏn ia Việt Nam mơnuih mơnam ngă pô bơkơnar rơnuk phrâo anai.