Jơnum tal anai jing tơlơi pơtruh nao rai tui tơđar plah wah gong gai kơnuk kơna hăng khul mơnuih ngă bruă mơdrô, kiăng čih pioh hơdôm tơlơi dŏ gun hơmâo sit nik hăng ngă pơgiong jơlan hơdră pơtrun. Thun anai, jơnum bơkơtuai phun kiăng pơsir hĭ tơlơi tơnap tap nao kơ bruă akŏ pơjing, kiăo tui hră pơtrun mơ̆ng Ding jum kơđi čar pơtrun pơđĭ kyar boh thâo ia rơgơi, pơvlih pơčeh phrâo, ba yua mrô hăng pơđĭ kyar sang bruă mơdrô yua mơnuih ƀôn sang ngă pô.

Ơi Đặng Hồng Anh, Khua khul sang bruă mơdrô yua hlăk ai ngă pô Việt Nam brơi thâo, hăng 34 mơta jơnum pơčrong sai nao rai gưl tơring čar, hrŏm hơbit hăng khua mua ƀơi tơring čar, bưp bơră ruai hăng khua mua amăng kơnuk kơna dêh čar, tơhnal pơkă lĕ pơtum abih bang hră pơar, anŏ kiăng laih anun rơkâo đĭ hăng kơnuk kơna, anom bruă hơmâo tơlơi dưi, brơi ngă gêh găl hloh kơ sang bruă mơdrô pơđĭ kyar.

 “Rim boh tơring čar, ƀôn prong ƀing gơmơi lêng kơ hrŏm hăng ƀing mơnuih rơgơi kơhnâo, ƀing kơsem min laih anun  ƀing khua mua amăng tơring čar amra pơblang tong ten, kah pơpha tơlơi pơhing; pơđing hmư̆ tơlơi pơgôp hiăp mơ̆ng ƀing ngă bruă mơdrô yua mơnuih ƀôn sang ngă pô hăng rơkâo đĭ tơring čar pô pơsir. Hơdôm tơlơi pơdjơ̆ nao tơlơi dưi mơ̆ng ding jum, anom bruă ƀơi gơnong dlông hăng kơnuk kơna lĕ gơmơi čih pơƀut hĭ mơ-it đĭ tơlơi rơkâo mơ̆ng sang bruă mơdrô kiăng hơmâo hơdră pơđĭ kyar klă hloh amăng rơnuk phrâo”.

Ƀơi mông jơnum, ƀing khua mua nao jơnum hơmâo pơčrong sai lu tơlơi lăi nao hăng tơring čar Dak Lak kah hăng ngă pơgiong tơlơi pơkă kơ anih tuh pơ alin, pơtum mơnuih mă bruă ngă tui djơ̆ tơhnal pơkă hnơ̆ng mơ̆ng tơring čar; pơđĭ  kyar anih sem lăng pơčrâo pơpha bruă mă sĭ mơdrô pơgang rơnoh gơnam tam đang hmua ngă atur čih djă pioh; pơtrut pơblih yua mrô, pơčeh phrâo hăng pơđĭ kyar khul ngă bruă pơphun bruă ngă pioh sĭ mơdrô.

Črăn pok brơi kơ tơlơi pơhiăp, pơčrong sai nao rai pioh lu mông kiăng sang bruă mơdrô bưp khua mua gong gai tơring čar hăng ƀing mơnuih rơgơi kơhnâo thâo tong ten 4 mơta bruă phun, pơčrong sai pơblih hơdră ngă hră pơar amăng kơnuk kơna, akŏ klôn bruă ngă hră pơar yua lŏn hăng prăk čan, pơblih yua mrô-pơblih pơčeh phrâo, hrŏm hăng hơdră pơđĭ kyar anih anom sĭ mơdrô hăng khul mơnuih mă bruă tŭ yua phrâo.

Amăng anun, kiăng tŭ mă lŏn anih man pơdong sang bruă hăng hơdră tuh pơ alin jing boh yom phun hơmâo lu mơnuih ngă khua mơdrô đing nao. Tui hăng ơi Nguyễn Huỳnh Vĩnh Huy, Khua khul ƀing ngă bruă mơdrô yua hlăk ai ngă pô tơring čar Dak Lak, tơdơi kơ pơmut glăi, tơring čar hơmâo anih gêh găl pơđĭ kyar prong biă mă samơ̆ lu sang bruă mơdrô ăt dŏ bưp tơlơi tơnap tap sit kiăng rơkâo lŏn, ngă anih man pơdong sang bruă, yua tơlơi phiăn pơkă aka ƀu ngă giong.

“Hơdôm sang bruă mơdrô ră anai hơmâo lu kơčăo bruă kiăng hơmâo lŏn ngă anih man pơdong pok pơhai. Tơdơi kơ pơmut glăi tơring čar lŏn tơnah dŏ lu samơ̆ ră anai aka ƀu hơmâo tơlơi pơkă či ngă djơ̆ găl, djru kơ sang bruă mơdrô dưi tŭ mă lŏn mơnai, ngă anih man pơdong. Yua kơ anun, ăt dŏ tơguan kơnuk kơna, gơnong dlông mơ̆n čih pơkra jơlan hơdră tơlơi phiăn pơtrun phrâo pioh djru kơ sang bruă mơdrô”.

Hơdôm tơlơi pơgôp hiăp mơ̆ng sang bruă mơdrô dưi hơmâo khua mua tơring čar hăng ƀing mơnuih kơhnâo kơhnăk, ngă pơrơđah laih amăng tal jơnum pơčrong sai anai. Lu boh yom phun lăi nao, rơgao tơlơi dưi pơsir mơ̆ng tơring čar, Khul čih pioh ăt čih pơƀut pioh, kiăng rơkâo đĭ hăng ding jum, anom bruă kơnuk kơna pơ gơnong dlông sem glăi, pơsir brơi.

Tui hăng ơi Đỗ Hữu Huy, Khua Jơnum min mơnuih ƀôn sang tơring čar Dak Lak, tơdơi kơ pơmut glăi tơring čar hlăk pơtong glăi anih anom, lŏn mơnai pơđĭ kyar hơmâo 3 kual, 3 jơlan ter bơwih ƀong huă hăng 2 anih anom phun pơtrut ngă bruă; gir run pơđĭ rơnoh pơhrui glăi GRDP pơkă dưm dưm mơ̆ng thun 2026-2030 khom dưi pơhrui glăi mơ̆ng 11% pơdlông, GRDP pơkă dưm dưm rim čô mơnuih pơhrui glăi truh thun 2030 sa čô mă bruă lơ̆m sa thun kiăng hơmâo 153 klăk prăk.

“Ƀing gơmơi čang rơmang djop sang bruă mơdrô, ƀing ngă bruă mơdrô, boh nik ñu khul ngă bruă mơdrô thun dŏ hlăk ai gum hrŏm khua mua tơring čar. Dak Lak ră anai ƀu kơnong ngă hmua pla pơjing đôč ôh, kual hơmâo anih pơkra gơnam sĭ mơdrô lu hăng prong biă mă, hơmâo gru grua hiam phara, laih anun anih anom pơđĭ kyar prong hloh. Kiăng nao truh pơ ataih hloh, ngă kơjăp tui, ƀing ta kiăng hơmâo boh thâo ia rơgơi mrô djru kơ bruă git gai wai lăng djơ̆ tơhnal pơkă, rơnoh prăk hăng pơyơr pran jua amăng bruă mă, ƀing ngă bruă mơdrô ba jơlan hlâo gir run pơtrut đĭ anŏ  pơđĭ kyar phrâo”.

Amăng tal jơnum anai, Jơnum min mơnuih ƀôn sang tơring čar Dak Lak hăng Khul ngă bruă mơdrô ƀing thun dŏ hlăk ai Việt Nam hơmâo kĭ hră pơkôl hơdor pioh ngă hrŏm hơduah ĕp tuh pơ alin, djru sang bruă mơdrô laih anun pơđĭ tui khul ngă bruă mơdrô thun dŏ hlăk ai amăng tơring čar gum ngă hrŏm.