Thượng tướng ơi Lương Tam Quang, ding kơna apăn bruă ping gah dêh čar, Kơ-iăng Khua ding jum kông an, Khua grup git gai wai pơgang rơnuk rơnua pơphun jơnum. Bruă pơtrun brơi pơgang rơnuk rơnua kơ jơnum prong hơdor glăi tal 70 thun hrơi blah dưi ƀơi Điện Biên Phủ hăng lu bruă mă pơprong pơkŏn mơ̆ng Ding jum kông an hơmâo pơkă bruă mă prong biă mă. Tui hăng tơlơi dưi jao laih amăng bruă mă, kông an djop sang bruă, djop tơring čar pok pơhai  tong ten ngă tui bruă pơhlôm, pơgang tơlơi rơnuk rơnua djơ̆ tơhnal pơkă.

Kơ-iăng khua ding jum ơi Lương Tam Quang lăi pơtong, hrơi blan pơ anăp, hơmâo 3 mơta bruă mă phun yôm amăng dêh čar pơphun ƀơi Điện Biên hăng ƀơi Đà Nẵng. Kông an djop anom bruă, djop tơring čar khom tŭ ư sa hnong bruă mă, tơlơi thâo hluh kơ tơhnal pơkă anun lĕ pơgang hơđong tơlơi rơnuk rơnua kơ djop mông jơnum, pok pơhai pơhaih rơđah rơđong; ƀu lui hơmâo tơlơi rung răng ngă dŏ kơtuă ôh. Lăi pơtong, anai jing bruă mă kơđi čar yôm biă mă kơ abih bang ling tơhan kông an mơnuih ƀôn sang amăng 6 blan akŏ thun. Kơ-iăng khua ding jum ơi Lương Tam Quang pơtrun hiăp  tơhan kông an  djop anom bruă, tơring čar ƀu dưi ngă amưng ôh, rơngiă tơlơi kơđiăng; prăp rơmet ĕp thâo kơ tơlơi pơhing, pơsir tañ djop bruă, tơlơi hơmâo pơdjơ̆ nao bruă pơgang rơnuk rơnua dơ̆ng mơ̆ng kual plơi pla mơtam.