Đĭ pơhiăp pok mông jơnum, ơi Vương Đình Huệ brơi thâo, amăng jơnum lok 5, Khua pơ ala mơnuih ƀon sang dêh čar amra pơphun hăng lu bruă mă mơng bruă čih pơkra tơlơi phiăn, krăo lăng hăng tơlơi pơsit hơdôm bruă akŏ phun. Hơdôm boh tơhnal pơgôp hiăp lĕ hơdôm bruă tơnap tap, sit biă ñu lĕ hơdôm bruă bơdjơ̆ nao lŏn mơnai, bơkơtưn man pơdong, nua sĭ mơdrô, sang dŏ … Yua anun, tui Khua pơ ala mơnuih ƀon sang dêh čar, jơnum tal anai kiăng pơsir hĭ tong ten hơdôm bruă dŏ pơmĭn phara hăng kiăng hơmâo tơlơi tŭ ư hrŏm kơplah wah anom bruă mơ-it đĭ hăng sem lăng. Kiăng kơđiăng sa, dua boh tơhnal kaih mơ-it nao anom bruă sem lăng hăng jơnum min apăn bruă Khua pơ ala mơnuih ƀon sang dêh čar bơbeč nao bruă ngă tui hơdôm bruă kiăo tui tlôn; sa, dua boh tơhnal yôm phun mơ-it Khua pơ ala mơnuih ƀon sang dêh čar truh ră anai djop ding jum ăt aka ƀu hơmâo tơlơi tŭ ư hrŏm.

Ơi Vương Đình Huệ rơkâo, hăng hơdôm bruă glêh tơnap, dŏ pơmĭn phara, hơdôm anom bruă mơ-it đĭ, djop ding jum, gơnong bruă kiăng pơčrông sai tong ten, tŭ ư hrŏm kah mơng dưi djơ̆ pran Khua pơ ala mơnuih ƀon sang dêh čar. Khua dêh čar rơkâo Ƀirô Khua pơ ala mơnuih ƀon sang dêh čar, jơnum min apăn bruă Khua pơ ala mơnuih ƀon sang dêh čar đing nao hơdră pơpha gưl, tơlơi dưi glăm ba kiăng pơsir hĭ tơnap tap lơ̆m ngă tui. Gah Kơnuk kơna, pơ anăp anai, Kơnuk kơna amra gir run ngă tui bruă pơpha gưl, tơlơi dưi glăm ba pơlir hăng pran gơgrong bruă.