Đĭ pơhiăp amăng mông jơnum, Khua git gai pơ ala mơnuih ƀôn sang dêh čar ơi Trần Thanh Mẫn brơi thâo, bruă lăi pơthâo dưm dăp man pơdong abih bang plơi prong jưh jom Hà Nội anăp nao 100 thun ƀu djơ̆ kơnong lăi pơhtâo sa pok hră pơ-ar dưm dăp đôč ôh mơ̆ ăt ba tơbiă tơlơi pơsit gir run ngă bruă, pơdah tong ten tơlơi gir run kơđi čar mơng ƀôn sang amăng bruă ba tơlơi pơtrun Jơnum tal 14 mơng Ping gah, tơlơi pơtrun Jơnum Ping gah ƀôn prong tal 18 mut amăng tơlơi hơdip mơda, djơ̆ hăng tơlơi git gai mơng Khua git gai Ping gah, Khua mir sir ơi Tô Lâm “Hà Nội lăi amra ngă, ngă tañ, ngă djơ̆, ba glăi tŭ yua, ngă truh gah mơtăm”.

Khua git gai pơ ala mơnuih ƀôn sang dêh čar rơkâo, Kơnuk kơna, djop ding jum, gơnong bruă hăng hơdôm anom bruă bơdjơ̆ nao tŏ tui gum hrŏm kjăp hăng Hà Nội amăng bruă pok pơhai tơhnal pơkă, hơdră bruă phara; lăp djơ̆ hăng tơlơi črâo ba, pơsir hĭ hơdôm tơlơi gun kơ tơhnal pơkă, hơdră bruă, pơhlôm mut hrŏm amăng pơphun ngă tui. Djop tơhnal pơkă, hơdră bruă hơmâo Khua pơ ala mơnuih ƀon sang dêh čar ba tơbiă hơmâo pok pơhai ngă mut hrŏm, tŭ yua, mut amăng tơlơi hơdip; djop ngăn rơnoh hơmâo jao kiăng mă yua brơi djơ̆ hơnong pơkă, djơ̆ tơlơi phiăn, yua kơ tơlơi pơđĭ kyar amăng lŏn ia hăng tơlơi yâo mơ-ak mơng mơnuih ƀôn sang.