Khua git gai pơ ala mơnuih ƀon sang dêh čar ơi Vương Đình Huệ nao pơhmư̆ mông jơnum. Pơhiăp ƀơi mông Jơnum, Khua git gai pơ ala mơnuih ƀon sang dêh čar ơi Vương Đình Huệ lăi, Jơnum anai jing bruă yôm biă mă, jing bruă yak đĭ pơ anăp, bang hyu tơlơi pơmin pơđĭ kyar, lăng nao pơ anăp, pơhưč bruă tuh pơ alin, ƀu kơnong pioh kơ tơring čar Hà Tĩnh đôč ôh mơ̆ ăt pioh kơ hơdôm boh tơring čar kual Kơdư tong krah, ter hang ia rơsĭ Tong krah lăi hrŏm.

Amăng hrơi blan pơ anăp, Khua git gai pơ ala mơnuih ƀon sang dêh čar ơi Vương Đình Huệ kiăng tơring čar Hà Tĩnh pơtrut pơplih, đĭ kyar hloh hăng 4 bruă yôm phun, 3 kual plơi prong, 3 anih bơwih ƀong hăng 1 anih phun pơtrut đĭ kyar, pơđĭ tui mrô gơnam pơkra rai, klă hăng tŭ yua hloh, dưi pơhno nao rai hăng tơring čar pơkŏn, pơđĭ tui prăk pơhrui, pơplih phrâo tơlơi hơdip, kiăng mơnuih ƀon sang tŭ mă hơdôm tơlơi đĭ kyar yua gơñu pơkra rai.