Lăp đing nao jơnum lok anai, Jơnum min apăn bruă phun pơ ala mơnuih ƀôn sang dêh čar amra pơphun tơña hăng lăi glăi amăng bruă sang phat kơđi hăng sang bruă ĕp kơđi mơnuih ƀôn sang. Khua sang bruă phat kơđi dêh čar ơi Nguyễn Hòa Bình hăng Khua sang bruă ĕp kơđi dêh čar ơi Lê Minh Trí lăi glăi tơlơi tơña. Ƀơi mông jơnum tơña lăi glăi, ƀing khua ding jum: Kông an, Tơlơi phiăn, Khua anom bruă sem lăng amăng kơnuk kơna lăi glăi tơlơi tơña, pơblang tong ten hơdôm bruă mă pơdjơ̆ nao.

Ăt amăng tal jơnum anai mơ̆n, Jơnum min apăn bruă phun pơ ala mơnuih ƀôn sang dêh čar pơgôp hiăp kơ hơdôm mơta bruă pơprong dŏ phara ba tơlơi kiăng amăng tơlơi phiăn pơkă nua čih pơkra glăi; tơlơi phiăn pơkă kơ bruă juă nua blơi gơnam čih pơkra glăi; pơgôp hiăp kơ tơlơi phiăn kông ngăn ia yua čih pơkra glăi; tơlơi phiăn wai lăng, pơgang ring bruă gah ling tơhan hăng anih anom ling tơhan dŏ; tơlơi phiăn Ngă ƀong hrom čih pơkra glăi; tơlơi phiăn pơkă kơ sang dŏ čih pơkra glăi.