Amăng mông jơnum, Jơnum min pơ ala mơnuih ƀôn sang tơring čar Gia Lai hơmâo sem lăng, pơsit pơhrua prăk tuh pơ alin man pơdong man ƀrô rơwang thun 2026-2030; pơplih akŏ bruă tuh pơ alin man pơdong thun 2026; hơdră pơđĭ kyar ngă hmua, ƀon lan, boh thâo ia rơgơi, sang dŏ mơnuih mơnam, pơđĭ kyar mơnuih mă bruă hăng djru brơi tơlơi hơdip mơnuih mơnam. Sit biă ñu, Jơnum min pơ ala mơnuih ƀôn sang tơring čar Gia lai tŭ yap mă yua tơlơi pơtrun pơhrua rơbêh 4.700 klai prăk mơng rơnoh prăk pơhrui hăng ngăn drăp pơplih mă yua hơdai nao thun 2026, đĭ tui abih tih rơnoh prăk tuh pơ alin man pơdong thun 2026 đĭ giăm 18.000 klai prăk.

Đĭ pơhiăp pơphun mông jơnum, Khua jơnum min pơ ala mơnuih ƀôn sang tơring čar Gia Lai Rahlan Chung rơkâo Jơnum min mơnuih ƀon sang tơring čar Gia Lai hrŏm hăng djop gơnong bruă, sang bruă, tañ ba tơlơi pơtrun mut amăng tơlơi hơdip, ngă gêh gal pơđĭ kyar tañ hăng hơđong kjăp brơi Gia Lai.