Jơnum lok 4 mơ̆ng Jơnum min apăn bruă phun pơ ala mơnuih ƀôn sang dêh čar amra pơphun amăng 6 hrơi, kah jing 2 tal. Tal 1 pơphun amăng ha hrơi ha mơkrah, mơ̆ng hrơi anai, kơnôl 8/7 truh kơnôl 9/7/2026; tal 2 pơphun amăng 4 hrơi ha mơkrah, mơ̆ng kơnôl 14 truh kơnôl 17/7/2026 laih anun amăng kơnôl 28/7/2026.

Ƀơi mông jơnum anai, Jơnum min apăn bruă phun pơ ala mơnuih ƀôn sang sem lăng pơgôp hiăp kơ Tơlơi phiăn pơhrua tui hơdôm tơlơi mơ̆ng Tơlơi phiăn Kač gru sang; Tơlơi phiăn ia jâo (čih pơkra glăi); tơlơi phiăn lŏn tơnah; Tơlơi pơtrun mơ̆ng Khua pơ ala mơnuih ƀôn sang kơ hơdră ngă bruă phara či pơsir hĭ bruă ngă soh bơdjơ̆ nao tơlơi bơwih ƀong kơnuk kơna ngă pô, tơlơi bơwih ƀong mơnuih ƀôn sang ngă pô hăng mă yua boh thâo ia rơgơi, măi mok yom, pơčeh tơlơi rơgơi, ba yua boh thâo mrô; Tơlơi phiăn čih pơkra, pơhrua tui hơdôm tơlơi mơ̆ng Tơlơi phiăn Sang bruă prăk Kơnuk kơna Việt Nam, Tơlơi phiăn pơgăn rao prăk (jing prăk mơ̆ng bruă bơwih ƀong soh tơlơi phiăn) hăng Tơlơi phiăn hơdôm sang bruă brơi čan prăk, hrŏm hăng lu kơčăo bruă, tơlơi pơtrun yom pơkŏn dong. Kơ bruă pơsit hơdôm bruă yom phun, Jơnum min apăn bruă phun pơ ala mơnuih ƀôn sang amra pơgôp hiăp kơ tơlơi pơtrun tuh pơ alin man pơdong jơlan ter plơi prong 5 - Kual plơi prong jưh jom Hà Nội; bruă pơplih glăi tơlơi pơtrun tuh pơ alin man pơdong jơlan rơdêh treng Lào Cai - Hà Nội - Hải Phòng; bruă akŏ pơdong ƀôn prong Quảng Ninh yua gơnong dlông wai lăng phun./.