Tŏ tui jơnum bruă tơlơi phiăn blan 4, hrơi anai (14/4), Jơnum min apăn bruă Khua pơ ala mơnuih ƀon sang dêh čar pơgôp hiăp amăng akŏ bruă tuh pơ alin man pơkra jơlan pơkuh nao rai hơdôm kual, pơkuh nao rai hơdôm tơring čar Khánh Hòa, Ninh Thuận hăng Lâm Đồng. Ring bruă hơmâo đơ đam lŏn mă yua giăm 129 ektar, amăng anun, lŏn glai kiăng pơplih mă yua lĕ 75 ektar, glông 57 km. Anih pơkuh nao rai hăng jơlan mrô 27C tơring čar Lâm Đồng, ară jơlan rơnuč kơplah wah tơring čar Khánh Hòa hăng Ninh Thuận. Abih tih rơnoh prăk tuh pơ alin jang jai giăm 1 rơbâo 929 klai prăk. Him lăng man pơkra giong amăng thun 2027.

Khua git gai pơ ala mơnuih ƀon sang dêh čar ơi Vương Đình Huệ lăi rơđah: Ară jơlan yôm phăn biă mă, pơgôp pơđĭ kyar glông jơlan ƀơi hơdôm kual čư̆ siăng kual Yŭ tơring čar Khánh Hòa lĕ ƀơi 2 boh tơring glông Khánh Sơn hăng Khánh Vĩnh. Laih dong, pok pơkuh nao rai hơdôm tơring glông čư̆ siăng amăng tơring čar Ninh Thuận, Lâm Đồng, pơtrut pơđĭ kyar bơwih ƀong huă-mơnuih mơnam, kơtưn wai pơgang rơnuk rơnua.