Pơhiăp pok phun mông jơnum, Khua git gai wai lăng pơ ala mơnuih ƀôn sang dêh čar ta ơi Vương Đình Huệ brơi thâo, amăng mông jơnum anai, Jơnum min apăn bruă Khua pơ ala mơnuih ƀôn sang gum pơhiăp kơ 3 rơwang bruă tơlơi phiăn yôm phăn kiăng lăi pơthâo hăng Khua pơ ala mơnuih ƀôn sang gum pơhiăp amăng Tal jơnum lok 5 hmâo: Tơlơi phiăn sĭ mơdrô lŏn sang (pơplih pơkra); Tơlơi phiăn dăng kông (pơplih pơkra) hăng Tơlơi phiăn Căn cước công dân (pơplih pơkra).

Ăt amăng mông jơnum anai mơn, Jơnum min apăn bruă Khua pơ ala mơnuih ƀôn sang gum pơhiăp kơ bruă lăi pơthâo kơ Khua pơ ala mơnuih ƀôn sang pơsit pơhrua nao amăng Jơlan hơdră čih pơkra tơlơi phiăn, phiăn pơtrun pioh kơ 2 rơwang bruă: Tơlơi phiăn jơlan nao rai, Phiăn hơđong pơhlôm ƀơi jơlan nao rai. Hrom hăng anun, ƀing khua pơ ala gum pơhiăp kơ Hră lăi pơthâo mơng Kơnuk kơna ba tơbiă sa dua hơdră bruă phrâo amăng bruă wai lăng mut, tơbiă, găn rơgao, dô̆ glăi mơng mơnuih dêh čar tač rơngiao ƀơi Việt Nam amăng Tơlơi pơtrun pơsit hrom mơng Khua pơ ala mơnuih ƀôn sang amăng tal jơnum lok 5; Hơdră pơtrun tuh pơplai rơwang bruă jơlan tô nao rai kual tô hơdôm bôh tơring čar Khánh Hòa, Ninh Thuận hăng Lâm Đồng./.