Mah hơmâo laih hơdră pơphun bruă mă samơ̆ bruă lăi pơthâo pơblang rơđah amăng bruă mă hlâo adih kiah ngă tui hơdôm tơlơi pơtrun kah hăng tơlơi phiăn pơkă hlâo, aka ƀu hơmâo tơlơi pơtrun pơkă kơ bruă mă tum teč, akŏ klôn kiăng pok pơhai bruă mă lăi pơthâo pơblang tong ten ƀudah boh tơhnal pơkă ruah mă bruă či lăi pơthâo pơblang glăi đôč, anun yơh bơbeč djơ̆ kơ boh tŭ yua amăng mông lăi pơthâo, pơblang brơi bruă mă.

Kiăng pơsir hĭ tơlơi kơƀah anai, hră pơtrun mrô 969 mơ̆ng Jơnum min apăn bruă phun pơ ala mơnuih ƀôn sang dêh čar jing sa tơlơi phiăn pơkă kơ bruă mă pơtô rơđah kiăng lăi pơthâo pơblang brơi bruă mă mơ̆ng pô hăng khua mua pơ dlông thâo tong ten, tum teč djơ̆ hăng tơlơi phiăn pơsir rim črăn. Bruă Jơnum min apăn bruă phun pơ ala mơnuih ƀôn sang dêh čar brơi pok pơhai tañ hră pơtrun mrô 969 amra djru pơđĭ tui boh tŭ yua lăi pơthâo pơblang glăi bruă mă kơ djop anom bruă gah sang bruă khua pơ ala mơnuih ƀôn sang dêh čar. Mơ̆ng anun, pơđĭ tui bruă prăp rơmet hlâo tañ mơ̆ng ƀing pơ ala mơnuih ƀôn sang dêh čar kiăng hmao kru kiăo tui ngă djơ̆ bruă jao, pơsir djop tơlơi hơmâo sit nik amăng tơlơi hơdip mơda mơnuih ƀôn sang; laih dơ̆ng krăo lăng bruă mă mơng Kơnuk kơna pơsir bruă mă hơdôm tơlơi ječ ameč hơmâo pơtrun laih mơ̆ng hlâo.