Amăng mông mă bruă, Khua mua hơdôm bôh anom bruă mơng Gong phun jua pơhiăp dêh čar Việt Nam lăi pơthâo kơ hơdôm bruă pôr pơhing mơng VOV, hơdôm tơlơi tơnap tap lom pơphun anăp nao gơgrong mă pô prăk kak mơng VOV tui Tơlơi pơtrun pơsit mrô 06 mơng Kơnuk kơna; tơnap tap amăng pơphun bruă mă lom khom ngă tui tơlơi hrŏ trun mơnuih mă bruă ƀong prăk blan tui tơlơi pơkă; hơdră pơkă bruă mă mơng ƀirô čih tơlơi pơhing amăng mông ră anai, lom ngăn drăp jai hrơi hrŏ trun lĕ tơlơi hơdip mơnuih apăn bruă, mơnuih mă bruă jai tơnap. Hrom hăng anun ba tơbiă hơdôm jơlan gah pơtlaih pơ̆ anăp anai.

Ding kơna Jơnum min bôh thâo pơtô pơhrăm mơng Khua pơ ala mơnuih ƀôn sang pơsit: VOV lĕ sa amăng 6 bôh ƀirô pôr tơlơi pơhing phun mơng dêh čar, ră anai bong glăi hăng lu tơlơi tơnap, tơlơi lông, tơlơi bơkơtưn gah hơdră pôr pơhing pơplih anô̆ bơdjơ̆ nao amăng hơdră mă bruă. Biă ñu hơdôm tơlơi tơnap gah hơdră pơkă, hơdră bruă hăng ngăn rơnoh. Jơnum min bôh thâo pơtô pơhrăm mơng Khua pơ ala mơnuih ƀôn sang amra gum hrom hăng VOV ba tơbiă hơdôm hơdră bruă, biă ñu lĕ hơdră bruă amăng Tơlơi phiăn pôr pơhing (pơplih pơkra) pơ̆ anăp anai kiăng pơsit pran gơgrong mơng hơdôm ƀirô pôr tơlơi pơhing phun hăng Tơlơi phiăn./.