Ƀơi anăp kơ ayuh hyiăng jai pơplih sat tui, Jơnum min mơnuih ƀon sang tơring čar Dak Lak phrâo hơmâo tơlơi črâo trun rơkâo djop gơnong bruă, sang bruă, anom bruă hăng gong gai ƀon lan gơgrong pơhlôm pơgang kơthel, ia dăo, ia kor, lŏn tơhroh amăng hơdôm blan rơnuč thun; laih dong prap lui hơdră pơhlôm pơgang không phang, kơƀah ia, ia mơsin ram hyu hăng apui ƀong glai bơyan phang thun 2026-2027.

Tơring čar rơkâo pơplih kơtang mơng ƀuh kah ngă hơdai nao gơgrong pơgang, ngă tui klă jơlan gah “4 ha anih”; pel ĕp hơdôm kual amuñ ƀuh ia lip, lŏn tơhroh, ia dăo, hơdôm boh sang anŏ kiăng ba đuăi, anih kơđăp hăng ling tơhan, gơnam măi mok prap mă yua. Khua Jơnum min mơnuih ƀon sang tơring čar Đỗ Hữu Huy lăi pơtong: Jơlan gah bruă mă thun anai lĕ pơgang jing phun, gơgrong ngă tañ, mơng ataih, anăm brơi truh ia lip ƀudah hơjan kah mơng ngă. Sit biă ñu kiăng pel ĕp ƀơi hơdôm anih him lăng amra ƀuh lŏn tơhroh, ia dăo, pơphô bruă kiăng pơgang pơgăn hŭi ba glăi tơlơi truh sat kơ mơnuih ƀôn sang.