Ƀơi mông jơnum, Jơnum min pơ ala mơnuih ƀôn sang tơring čar Gia Lai tŭ ư hăng hơdôm tơlơi pơtrun yom kah hăng: pơsit prăk kăk či brơi yua amăng thun 2025; Akŏ bruă đĭ kyar bơwih ƀong huă - mơnuih mơnam 5 thun rơwang thun 2026-2030; lui hĭ tơlơi pơtrun kơ anom bruă dưi kĭ bruă kiăng ngă hăng mrô prăk kơnuk kơna pioh mă yua re se ƀơi tơring čar; čih pơkra, pơhrua tui hơdôm hơnong pơkă anih rim djuai lŏn, nua rim djuai lŏn thun 2026; pơkă hơdră djru kơ mơnuih ba atâo nao čuh amăng apui. Kơ bruă dăp glăi anih mă bruă djŏp gưl hăng 1 thun mă bruă tui gong gai 2 gưl, lăi pơthâo glăi ƀơi mông jơnum brơi ƀuh ăt dŏ hơmâo mơn anŏ tơnap.

Hmư̆ hing hloh lĕ hơdôm hră pơ-ar, mrô aka ƀu hơmâo pơmut hrŏm djŏp ôh; tơlơi apăn bruă, tơlơi rơgơi mơ̆ng ƀing mă bruă lơ̆m ngă hră pơ-ar dŏ tơdu mơn. Hơmâo hơdôm boh tơring kơƀah mơnuih mă bruă gah lŏn tơnah, man pơdong, prăk kăk, boh thâo ia rơgơi hăng mă yua boh thâo mrô. Bruă aka ƀu jao mrô mơnuih mă bruă sit nik tơdơi kơ dăp glăi anom bruă ăt ngă tơnap mơn bruă jao bruă, ruah pơhrua hăng mă yua khua mua, mơnuih mă bruă ƀơi sang să./.