Pơhiăp ƀơi mông jơnum, ơi Lưu Văn Trung, Khua jơnum min pơ ala mơnuih ƀôn sang tơring čar Lâm Đồng, pơsit, găn rơgao lu tơlơi tơnap, tơlơi lông amăng thun 2025, tơlơi bơwih ƀong Lâm Đồng ăt đĭ mơn hăng 16/19 rơnoh pơkă dưi ngă laih anun rơgao kơ rơnoh ba tơbiă; prăk pơhrui kơ Kơnuk kơna him lăng hơmâo rơbêh 31.200 klai prăk, đĭ 11% rơnoh pơkă tơring čar jao hăng đĭ 17% pơhmu hăng Kơnuk kơna jao; bruă ngă hmua ăt đĭ mơn, pơƀuh tơlơi gơgrong nao hlâo mơ̆ng tơring čar, hăng rơbêh 107.000ha đang hmua mă yua boh thâo ia rơgơi, hăng giăm 150.000 ha lŏn ngă hmua hơdjă rơnuk rơnua; hơdôm bruă apui lơtrik, pơkra bôxit alumin ăt pơgôp đĭ kyar hrŏm mơ̆ng tơring čar....Ƀơi jơnum lok 7, Jơnum min pơ ala mơnuih ƀôn sang tơring čar tal 10 pơƀut pơčrông, pơsit 32 hră lăi pơthâo hăng 21 tơlơi pơtrun, amăng anun hơmâo lu tơlơi pơtrun akŏ phun, ngă sui thun.

Ƀơi phường Pleiku, jơnum lok 5, Jơnum min pơ ala mơnuih ƀôn sang tơring čar Gia Lai tal XII, tơña kơ bruă pơhlôm hlâo hơjan ia ling dăo, tơlơi glăm ba amăng wai lăng, hơdôm anih pơđoh hĭ ia hăng hơdôm hơdră bruă kiăng pơhlôm rơnuk rơnua sui pơ anăp lơm ayuh hyiăng jai ƀuh pơplih sat hơmâo lu mơnuih ƀôn sang đing nao. Lăi glăi tơlơi tơña, ơi Cao Thanh Thương-Khua gơnong bruă ngă hmua hăng ayuh hyiăng Gia Lai-pơsit tong ƀu hơmâo bruă pok trun ia amăng ia krông Hà Thanh ôh. Ƀơi ară ia krông anai ƀu hơmâo dơnao pơkŏng ia ôh; dua bơnao ia pơprong gah Ngŏ tơring čar lĕ Núi Một hăng Định Bình amăng tal hơjan ia ling dăo rơgao lêng aka ƀu bă blai hăng pok ia kơnong bơdjơ̆ nao ia krông Côn đôč.

Ơi Cao Thanh Thương ăt lăi nao tơlơi glêh tơnap lơm pơđoh trun ia, anun lĕ bruă man pơdong giăm ia krông, pla phun keo amăng kual pơđoh đuăi ia ngă glông ia rô trun anet tui; ha bơnah ƀơi bơnư̆ kŏng ia Hà Thanh pơčah hơdôm hơpluh met yua ia bă blai hăng man pơdong jum dar. Kơ jơlan gah sui pơ anăp, hơdôm boh ƀon lan kiăng pel ĕp glăi hơdră ba đuăi mơnuih ƀôn sang tui rĭm gưl lơm hơjan ia ling dăo.