Ngă lơphet anai, rŭi tơhan, rơbat pơtrui dưi pơphun hăng pơnah 21 asar phao kơnông hrŏm hăng gru rup hla kơ djă anăn lŏn ia Cộng hòa xã hội chủ nghĩa Việt Nam. Giong anun, rơdêh por bek por tôl yôl hla kơ ping gah, hla kơ dêh čar por nao rai ƀơi ngŏ adai tơdron čung boh lông anih ngă lơphet. Tơdơi kơ khua mua đĭ pơhiăp, hơmâo Khua dêh čar ơi Phạm Minh Chính, khua mua pơ ala tơhan Điện Biên đưm, ƀing pơ ala hlăk ai tơdăm dra ră anai đĭ pơhiăp. Jơnum jao miđai rơngai mrô sa kơ ping gah, gong gai kơnuk kơna hăng mơnuih ƀôn sang djop djuai ania tơring čar Điện Biên laih anun tuč rơnuč lĕ rŭi tơhan, rơbat pơtrui lăng kơdrưh biă mă.

Abih bang mơnuih mut hrŏm rơbat pơtrui ngă lơphet truh 12.000 čô. Khul rơdêh por por nao rai yŭngŏ dơnung kơdư anih jơnum, găn nao pơ kơdư A1, anih anom gru đưm puih tơhan, pơsat gong kut tơhan djai pơsăn drơi yua kơ lŏn či kơdư A1, Gong kut gru djă pioh Blah dưi ƀơi Điện Biên Phủ, Sang djă pioh gơnam gru Điện Biên Phủ…., rĭm khul anom bruă, sang bruă rŭi hrŏm rơbat pơtrui găn či anăp anih khua mua hăng ană plơi pla dŏ ĕp lăng, hrŏm hăng tơlơi ră ruai glăi tum teč mơ̆ng tal kơsung blah khin hơtai hing ang, tơlơi kơtang pran jua gum pơgôp djop djuai ania yua ping gah Cộng sản Việt Nam hăng Khua mir sir Hồ Chí Minh pô git gai, dưi ba truh hơmâo boh tơhnal blah dưi ƀơi Điện Biên Phủ hmư̆ hing truh pơ rơma kual lŏn hang ia rơsĭ, hing ang tar ƀar rŏng lŏn tơnah.