Laih anun hơgĕt hơmâo lĕ brơi ƀuh, rĭm wơ̆t jơnum ngui jing rĭm wơ̆t tơring čar Dak Lak gir run hloh pơtrut đĭ tơlơi bơwih ƀong huă hăng pơbŭ tui gru grua hiam kơphê. Amăng sa blah đang gru grua hiam, lu mơta, lu hơdră ngă hiam kiăng pơjing pran kơtang pơtrut brơi Dak Lak ƀơ ƀrư̆ anăp nao kơ tơhnal pơkă prong mơ̆ng pô.

Ơi Đỗ Như Ý, ƀơi ƀôn prong Hà Nội sa amăng hơdôm hơpluh rơbâo čô tuai hyu ngui amăng mông jơnum ngui bruă kơphê Ƀuôn Ma Thuôt tal 8. Hăng ñu lĕ, Jơnum ngui bruă kơphê tal anai, pioh glăi amăng pran jua ñu mơak biă mă rĭm kơ bruă ngui ngor phara phara. Ñu ăt mưn amăng pran jua kơphê Ƀuôn Ma Thuôt hăng tơlơi mut tơma hrom kual lŏn mơnai glai klô, ană mơnuih mơnam hăng gru grua hiam mơ̆ng kual lŏn anai:

“Kâo ĕp lăng bruă či jơnum ngui kơphê Ƀuôn Ma Thuôt dơ̆ng mơ̆ng hrơi arăng phrâo pơhrăm glăi adoh suang hlâo kơ truh mông ngui ngor sit nik, laih anun truh pơ mông pơdah adoh suang rŭi ƀơi jơlan prong, mlam adoh suang, pơdah apui bơngač ngă rup hiam. Kâo hơmâo mơñum kơphê ƀơi jơlan Phan Đình Giót....Kâo ƀuh ngă lơphet, jơnum ngui bruă kơphê anai prong kơdrưh biă mă, kâo hok mơak amăng pran jua, ayuh hyiăng rơ-ơ̆ pơđao, ană mơnuih jĕ giăm, kơphê jơman hăng djơ̆ lăp đôm jă lŏn mơnai glai klô kual Dap Kơdư hing ang”.

Lơ̆m ƀing tuai mơ̆ng ataih ƀu wor rơbit ôh 5 hrơi ngui ngor mơak ĕp adoh suang, lăng apui pơčrang bơngač, lu mơta ia iom, mơnâo ƀâo bơngưi hiam hăng pran jua jum tuai, khăp pơpŭ kơ tuai rơnguai plơi pla phun kơphê lĕ, ƀing khua mua pơphun jơnum ngui bruă kơphê hăng lu bruă mă lar truh pơ djop tơring glông, plơi prong amăng tơring čar Kon Tum, ăt dŏ đôm glăi anŏ hiam amăng pran jua djop pô. Ơi Hồ Sỹ Trung, khua đang kơphê anăn V’Ori, tơring glông Krông Pač, tơring čar Dak Lak brơi thâo, anai lĕ tal blung a hrom hăng anom bruă amăng tơring glông jơnum ngă hrom mơak Jơnum ngui bruă kơphê Ƀuôn Ma Thuôt tal 8, samơ̆ hơmâo pơjing rai lu anŏ kơđŏm pioh amăng pran jua ƀu thâo wor rơbit ôh.

Măi hrong ia kơphê, arăng ba dưm pơ anih gru phun djă pioh bruă kơphê gưl dêh čar ƀơi Blôk đang kơphê Cada, hrong ia kơphê ƀu pơdơi mơtam, kiăng pơjing ia kơphê djop pơpha kơ tuai mơñum, lơ̆m nao čuă anih anom gru phun bruă kơphê rơbêh 100 thun pơ hlôm adih. Ơi Hồ Sỹ Trung čang rơmang, hơdôm hrơi jơnum ngui bruă kơphê phrâo rơgao ƀu kơnong dŏ đôm glăi anŏ hiam hơgĕt arăng ƀuh đôč ôh, dŏ pơhrâm kơ tơlơi khăp bruă mă pơjing rai kơphê, pơhưč lu hlăk ai gum tơngan hrom pơđĭ kyar anom bruă sĭ mơdrô kơphê, jing gru grua hiam kơphê Dak Lak:

“Rĭm hrơi mơtam mơnuih ƀrĭ ƀrĭ hăng jơngum mơak biă mă tơdơi kơ hyu ĕp lăng mă rup video pơ đang kơphê laih anun mơñum ia  kơphê, čuă jơmư ĕp anih pơkra ming ia kơphê amăng jơlan ia kơphê Việt hăng ƀing hlăk ai dŏ nao ĕp lăng anih djă pioh hră čih kơ bruă phun hơmâo kơphê hăng thâo hluh rơnoh yôm mơ̆ng blôk hmua đang kơphê Kada jing anih akŏ pơjing hmua pla kơphê blung Việt Nam, bang bơngač hyu tơlơi anun truh pơ djop gơyut gơyâo ƀing hlăk ai thâo hluh tong ten bruă ngă sui thun tơdơi anai....”.

Amăng khul mơnuih lu nao ngui pơ mông jơnum ngui bruă kơphê Ƀuôn Ma Thuôt tal 8, ơi Nguyễn Văn Lạng, Khua hơđăp jơnum min mơnuih ƀôn sang tơring čar Dak Lak, ñu pô ngă hrom 8 wơ̆t jơnum ngui bruă kơphê dưi pơphun mơ̆ng blung a, Dak Lak ƀu kơnong pơphun prong hloh đôč ôh; hăng lu mơta tơlơi ngui ngor, lu mơta bruă mă, găn rơgao, kơsem min hơduah ĕp, pơphun hăng bruă mă hmar thâo rơgơi hloh mơ̆n, laih anun djă gru mut phung lu mơnuih djop plơi pla ƀuh rơđah hăng hơđong pran jua hloh.

“Jơnum ngui tal anai pơkĕ hrom, tŏ tui lu hơdră pơphun mơak amăng bruă kơphê dŏ hơmâo bruă ngă pơkŏn ngui ngor, pơdah rai anŏ kơtang gêh găl mơ̆ng tơring čar Dak Lak arăng nao ƀuh anun lĕ plơi prong mơ̆ng kơphê mơnuih ƀôn sang djop pô yua kơphê soh, djop pô amra jing mơnuih thâo rơgơi gah bruă kơphê, kiăng lăi abih bang mơnuih ƀôn sang ngă hrom gơñu pôr pơhưč lăi pơthâo hăng tuai amăng rŏng lŏn tơnah”.

Ăt jing mơnuih tom ƀuh 8 wơ̆t jơnum ngui bruă kơphê, laih dơ̆ng lir hơbit tong ten hăng ană plơi pla ngă bruă pla kơphê Việt Nam, nai prin tha Trịnh Đức Minh, Khua Khul bruă kơphê Ƀuôn Ma Thuôt lăi lĕ, Jơnum ngui bruă kơphê tal 8 jing anŏ arăng đing nao boh yôm yôm pơphăn hiam klă mơ̆ng gru grua hiam kơphê, lơ̆m pơhrua hrom  lu tơlơi bơ ră ruai workshop hăng talkshow amăng mông jơnum prong. Nai prin tha Minh lăi pơtong, jơnum ngui bruă kơphê tal anai tŭ yua lĕ pôr pơthâo boh tơhnal mơ̆ng anom bruă kơphê hăng gru grua kual Dap Kơdư, laih dơ̆ng anăp nao kơ bruă kơphê jing pô phun ñu pơdah amăng mông ngui ngor bruă kơphê, hơmâo lu yak rơbat phrâo lăp djơ̆ pơđĭ kyar pơkra ming gơnam sĭ mơdrô hăng pơbŭ đĭ gru grua kơphê kơñ pơgi adih anai:

“Jơnum ngui tal anai lăi pơthâo mơnuih ƀôn sang ƀuh lu mơta mơnong, lu bơnah, ƀuh prong, ĕp lu mơ̆ng gru grua hiam kơphê. Bơhmutu ƀơi lu anih ngă workshow, tơlơi bơ ră ruai anet ƀiă mơnuih ƀôn sang  ăt lăi pơthâo gŏ če, blŏ ia hrong kơphê, lŭk ia kơphê hăng hling ia kơphê pioh mơñum. Ƀudah lăi nao kơ bruă mơñum kơphê ră glai phun đưm kơphê arăng hrong hăng phin hiư̆m pơtong glăi. Jơnum ngui bruă kơphê hơmâo djru mơnuih blơi yua thâo hluh rơnoh yôm sit nik mơ̆ng kơphê hăng anŏ pơjing rai ia iom jă kơtang hloh mơ̆ng bruă kơphê pioh pơthâo brơi tuai čuă ngui thâo”.

Jơnum ngui bruă kơphê Ƀuôn Ma Thuôt tal 8, pơphun amăng lu tơhnal ƀuh gêh găl hloh, hăng rơnoh kơphê đĭ yôm hăng hơđong hrom hăng lu hơjai dưm kơphê mơ̆ng tơring čar Dak Lak ăt dŏ buă ƀlŏl, hăng abih 5 hrơi jơnum ngui lêng kơ adai pơ-iă angin djong, adai rơ-ơ̆, hrom hăng lu kơčăo bruă pơprong  mơ̆ng Ƀuôn Ma Thuôt hlăk amăng črăn či glăi truh pơ anih pơkă. Ơi Trần Đức Nhật, Kơ-iăng Khua jơnum min mơnuih ƀôn sang plơi prong Ƀuôn Ma Thuôt brơi thâo, plơi prong ăt amăng thun blung a ngă tui tơlơi phiăn pơkă phara sa dua bruă khom ngă, dưi hơmâo khua mua pơ ala mơnuih ƀôn sang dêh čar pơsit brơi laih, hlăk kơsem min čih pơkra dơ̆ng man pơdong plơi prong Ƀuôn Ma Thuôt jing plơi prong kơphê mơ̆ng rŏng lŏn tơnah....Yua kơ anun, boh tŭ yua mơ̆ng jơnum bruă kơphê Ƀuôn Ma Thuôt tal 8 hơmâo boh tŭ yua yôm pơphăn biă mă amăng črăn phrâo pơ anăp adih:

“Pơphun jơnum ngui bruă kơphê Ƀuôn Ma Thuôt tal 8 lĕ akŏ phun pioh ƀing ta ngă giong hăng pơhrua nao dơ̆ng amăng bruă čih pơhrua anăn Ƀuôn Ma Thuôt jing plơi prong kơphê rŏng lŏn tơnah, pơtong rơđah bruă mă lăng nao pơ anăp adih bruă hơgĕt phun hloh mơ̆ plơi prong Ƀuôn Ma Thuôt kiăng ngă pơ anăp. Čang rơmang lĕ Ƀuôn Ma Thuôt ƀrư̆ ƀrư̆ jing anih arăng bâo djơ̆ anăn, lok djơ̆ plơi prong hmư̆ hing mơ̆ng Việt Nam kah hăng lok djơ̆ anăn plơi prong kơphê rŏng lŏn tơnah”.

Rơbêh 100 thun hăng anai, phun kơphê pơđĭ kyar ƀơi Dak Lak, giăm 20 thun jơnum ngui bruă kơphê Ƀuôn Ma Thuôt dưi pơphun, phun kơphê hơmâo tơma hram amăng tơlơi hơdip mơda  hăng gru grua hiam mơ̆ng djop djuai ania amăng tơring čar, bang hyu tơlơi bơngač ñu bă hră amăng kual Dap Kơdư hăng amăng dêh čar. Hrom hăng mông jơnum ngui bruă kơphê 2 thun pơphun sa wơ̆t, tơring čar Dak Lak-plơi prong Ƀuôn Ma Thuôt jing anih anom phun pơplông kơphê jơman hloh Việt Nam, ba kơphê hmư̆ hing Việt Nam hyu djop anih amăng rŏng lŏn tơnah; lăi pơthâo bruă akŏ pơjing hăng tŭ yua anŏ hiam anih anom jum dar pơjing rai kơphê phara biă mă laih anun tŭ mă rơnoh sĭ mơdrô, bơwih ƀong huă.

Hrom hăng anun, Jơnum ngui bruă kơphê hơmâo atông čing ring hơgor, jơnum ngui bơyan phang bơnga mơ̆ng djop djuai ania mơ̆ng kual Yŭ Kơdư, Ngŏ Kơdư, Jơnum ngui mơak adoh pơtưh Quan họ Bắc Ninh ăt kah hăng ƀrư̆ hrơi mut hrom sa hnong amăng kual lŏn anai. Kual lŏn anai gru grua hiam lu mơta, lu anŏ klă kah hăng tơmeh phun  bơwih ƀong huă, gru grua kơphê, hlăk pơjing rai pran kơtang ba Dak Lak anăp nao truh tơhnal pơkă prong mơ̆ng gơñu pô; man pơdong plơi prong Ƀuôn Ma Thuôt jing anih kơphê mơ̆ng rŏng lŏn tơnah rai dŏ hrom.