Ƀrô hrơi ngă lơphet 77 thun hrơi Anom ngă ƀong hrŏm Việt Nam (11/4), mơguah lơ 6/4, Anom bruă pôr tơlơi pơhing phrâo, Gong phun pơtui jua pơhiăp Việt Nam ngă hrŏm hăng Khul pơlir hơbit Anom ngă ƀong hrŏm Việt Nam pơphun jơnum pơčrông sai “Pơđĭ kyar bơwih ƀong huă hrŏm amăng khul, ngă ƀong hrŏm amăng rơwang phrâo”.

Jơlan hơdră jơnum kah jing 2 tal, hơmâo anăn “Tơlơi hluh djơ̆ kiăng hơmâo hơdră djru lăp djơ̆ hăng bơwih ƀong hrŏm” laih anun “Pơkra glăi Tơlơi phiăn ngă ƀong hrŏm 2012- Tơlơi pơtrut phrâo kơ tơlơi bơwih ƀong hrŏm amăng khul grup”. Ƀơi mông jơnum, ƀing khua pơƀut ngă rơđah hloh tơlơi gơgrong bruă mơng bơwih ƀong hrŏm abih bang mơnuih, amăng anun phun ñu lĕ anom ngă ƀong hrŏm; kiăng tañ ngă giong tơlơi pơkôl pơkă djơ̆, phun ñu lĕ pơkra glăi Tơlơi phiăn anom ngă ƀong hrŏm pơtrut bơwih ƀong hrŏm khul grup hăng anom ngă ƀong hrŏm ƀơi rŏng lŏn tơnah hăng ƀơi Việt Nam.