Jơnum ruah khua tal anai hơmâo pơsit hĭ Hră pơtrun kơ bruă mă, pơtong rơđah 13 tơhnal bruă či ngă, 05 bruă mă glăm ba phun yom; 07 jơlan hơdră, akŏ bruă phun ngă tui amăng rơwang bruă phrâo mơ̆ng thun 2026-2031. Sa tơlơi phrâo hloh lăi nao, ngă bruă hơmâo boh tŭ yua yom, pơ anăp anai amăng rơwang bruă phrâo jơnum tal anai lĕ pơtong rơđah, pok pơhai bruă mă “Hlăk ai Việt Nam kơsung nao pơ anăp amăng rơnuk rơbâo thun phrâo”, pơjing tơlơi kơtang, pơtrut pran jua kơsung nao pơ anăp, pơčeh phrâo hăng anŏ kiăng prong amăng pran jua mơ̆ng khul hlăk ai.

Jơnum ruah khua tal anai pơtong rơđah pok pơhai jơlan hơdră “Pơđĭ kyar hlom bom kơ hlăk ai Việt Nam” amăng bruă hrăm hră, pơđĭ tơlơi thâo rơgơi, pơđĭ kyar, pơhrăm drơi jăn pô; pơđĭ tui tơlơi hơdip mơda gru grua hiam. Hăng tơlơi kiăng “Khin hơtai hrưn đĭ pô-Kơsung nao pơčeh phrâo-Anŏ kiăng pơyơr pran jua-Ngă pô kơñ pơgi”, Jơnum tal anai iâu pơthưr abih bang djop gưl khua mua apăn bruă khul tơdăm dra, hlăk ai, ƀing tơdam dra mut phung Việt Nam amăng dêh čar hăng pơ tač rơngiao thâo hluh rơđah bưng bôt, anŏ gơgrong ba kơtang tơlơi khăp kơ lŏn ia, tơlơi kiăng pơđĭ kyar, pran jua  pơ-ư ang djuai ania, rơnoh yom gru grua hiam ană mơnuih Việt Nam, pran jua hur har mơ̆ng hlăk ai kiăng pok pơhai ngă tui mơtam boh yom phun dưi hơmâo mơ̆ng jơnum tal anai pơtrun ngă, pơjing anŏ phun gơgrong ba bruă ngă amăng sa rơwang bruă phrâo hăng boh tơhnal tŭ yua phrâo mơ̆n.