Hăng anih dŏ phara biă mă sang khuer DKI, pơdong ƀơi anih hơjăn păn đôč, ƀơi kual ia rơsĭ, anih dŏ tơnap tap hŭi rơhyưt, bruă ĕp lăng ayuh hyiăng hlim hơjan gleh glar, juăt hơmâo rơbŭ kơthel pưh găn nao amăng kual. Lơ̆m hơmâo tơlơi pơkă kơ bruă mă kơtrâ̆o hăng tơnap, kiăng djop pô khom khin hơtai, kơjăp pran jua biă mă kah dưi bong glăi, tơlơi pơmin khut khăt tong ten sit nik hăng Lŏn ia, hăng Ping gah laih anun mơnuih ƀôn sang, amra tuh drah pơčah asar yua kiăng pơgang jơlan guai dêh čar. Yua kơ anun yơh, tui hăng Đại tá Trần Mạnh Chiến, ding kơna ping gah anom bruă kơđi čar kual 2 tơhan sơlup-gah anom bruă Khua tơhan sơlup kual 2 đing nao biă mă kơ bruă glăm ba:

“Ƀing gơmơi pơtong rơđah kiăng dưi ngă tơlơi anun hă, khom ba yua pran jua hơdră bruă mơ̆ng abih bang brơi djơ̆ lăp hăng bruă ngă sit nik ră anai. Amăng anun, pơtô hrăm pran jua glăm ba, khin hơtai amăng bruă kơđi čar, tơlơi kiăng pơsit khut khăt yơh phun. Pơđĭ tui tơlơi glăm ba ba gru hlâo, bruă glăm ba mơ̆ng rim čô mơnuih ngă khua, apăn bruă, mơnuih ping gah lơ̆m pok pơhai bruă mă sa tơlơi phun. Đing nao kơ tơlơi anai, hơmâo tơlơi djru mơ̆ng gah klôn lĕ sang anŏ, ană bơnai ƀing khua mua hăng ling tơhan, ngă tui lăp djơ̆ jơlan hơdră kơnuk kơna pioh kơ ƀing ling tơhan sa tơlơi yom hloh, bruă khom ngă re se na nao. Ngă klă boh yom phun lăi anun, sa tơlơi yom hloh, pơsit nao kơ atur kơjăp tơlơi pơmin, bruă či ngă mơ̆ng abih bang rim čô khua mua, ling tơhan khom ngă”.

Tui hăng Trung tá Nguyễn Trung Đức, Khua git gai ping gah, ding kơna anom bruă kơđi čar khul ling tơhan Tiểu đoàn DKI, BTL kual 2 tơhan sơlup: Amăng rơwang bruă laih rơgao, djop khul ping gah mơ̆ng anom bruă Sang khuer ƀơi ia rơsĭ DKI hơmâo git gai, pơčrâo bruă ngă giong djop tơhnal pơtrun, bruă mă hơmâo pơdah thâo hăng lu boh tơhnal dưi ngă kah hăng: Dŏ gak krơ̆ng mơta, wai lăng, sem ĕp na nao tơlơi pơhing ƀơi adai rơngit, ƀơi kual ia rơsĭ, kiăng lăi pơthâo hmao kru tui atur ƀuh pioh git gai pơsir lăp djơ̆, tơpă sit hăng pơgang djop tơlơi či hơmâo, amra tơgŭ blah glăi tơdah ƀing ayăt rai suh, akŏ pơdong ling tơhan beč bal sit nik, pơtô hrăm bruă ling tơhan tong ten hloh, mă bruă tơpă hơnơ̆ng, dưi djru ba, pơgang mơnuih ƀôn sang mă akan hơdang amăng ia rơsĭ. Bruă mă amăng ping gah, bruă kơđi čar, bruă djru čem rông tơhan, hơdră boh thâo ia rơgơi dưi pok pơhai sa amăng plĕ, hơmâo boh tŭ yua. Tơlơi pơhing kơđi čar amăng tơlơi pơmin khom hơđong, amăng lăm khom thâo gum pơgôp, tŭ ư hrŏm sa pran jua, anih anom khom rơnuk rơnua hơđong djop mơta, ƀu hơmâo hlơi pô ngă soh tơl pơsir tơlơi soh jăm ƀuah. Trung tá Nguyễn Trung Đức, brơi thâo:

“Yua anih dŏ tơnap tap, gleh glar hăng lu bruă či ngă ječ ameč anun yơh tơlơi gơgrong ba mơ̆ng djop gưl anom bruă, khul ping gah amăng djop sang bruă khuer amăng ia rơsĭ DKI yom biă mă laih anun khom răng kơđiăng na nao thâo hluh tong ten tơlơi pơhing, lăi lui hlâo tơlơi pơhing či truh, pơtong rơđah hơdră git gai pơsir klă djop tơlơi či hơmâo, phrâo, tơlơi ječ ameč kah hăng hơmâo ƀattô mut rai amăng guai ia rơsĭ dêh čar wai lăng; tơlơi pơhing ječ ameč lŏn adai ngă, angin rơbŭ, kơthel, bruă pơklaih mơnuih lu amăng mông ječ ameč...”.

Hơdôm boh sang khuer ƀơi ia rơsĭ DKI pơdong puih kơđông raih daih amăng kual ia rơsĭ gah Dơnung dêh čar bưp ƀu ƀiă ôh tơlơi tơnap tap. Ƀu kơnong tơnap tap yua ayuh hyiăng lŏn adai đôč ôh, tơnap amăng bruă pok pơhai ngă tui hră pơtrun, tơlơi pơčrâo ba....boh nik ñu bruă prăp lui anŏ gêh găl kơ bruă jơnum ruah khua ping gah. Samơ̆ anom bruă ping gah, khua mua git gai tơhan Tiểu đoàn DKI hơmâo ngă tui hơdră beč bal thâo pơčeh phrâo djơ̆ lăp, kiăng ngă gêh găl kơ bruă jơnum ruah khua tŭ yua. Đại úy Bùi Thanh Hưng, Khua git gai ping gah, ding kơna kơđi čar Sang khuer ƀơi ia rơsĭ DKI/9 lăi pơthâo:

“Khul sang bruă ping gah gơmơi pơdong sang bruă ƀơi kual ia rơsĭ ataih mơ̆ng hang, dưi hơmâo tơlơi đing nao djơ̆ lăp mơ̆ng Ping gah, khua mua git gai khul ling tơhan tiểu đoàn, anom bruă ping gah tơhan kual. Amăng rơwang bruă laih rơgao, anom bruă ping gah gơmơi hơmâo ngă giong bruă jao hiam klă biă mă. Tơlơi anun pơƀuh amăng bruă ngă giong bruă kơđi čar mơ̆ng sang bruă, tơlơi gum pơgôp  hơđong amăng ping gah, tơlơi pơđĭ kyar tong ten jing sa tơlơi gir run mơ̆ng abih bang rim čô mơnuih ping gah hăng ƀing tơhan aka mut ping gah. Boh tơhnal tŭ yua mơ̆ng jơnum ruah khua ping gah mơ̆ng djop sang bruă  khuer amăng ia rơsĭ đăo kơnang kiăng khua mua hăng khua mua djop sang khuer amăng kual ia rơsĭ DKI amra kơtang hloh dŏ ƀơi anih ia rơsĭ tơdlăk kơtang, rơbŭ kơthel pơhŭi kiăng pơgang tong ten tơlơi rơngai kơ hang ia rơsĭ hăng amăng lăm dêh čar mơ̆ng gah Dơnung”.

Hrŏm hăng črăn bruă prăp lui hăng pơphun jơnum ruah khua, djop khul anom bruă ping gah amăng sang khuer, ngă klă bruă jao, kơđi čar, tơlơi pơmin, jơlan hơdră, pơhlôm tong ten tơlơi gum pơgôp, tŭ ư hrŏm kơjăp hloh; lăng bruă git gai ngă klă bruă kơđi čar, lir hơbit hăng bruă jak iâu bơkơtưn mă bruă. Pơđĭ tui pran jua mă bruă, răng kơđiăng na nao, amra kơsung blah, prăp lui kơsung blah hmao kru tơdah hơmâo tơlơi hơgĕt amăng kual ia rơsĭ. Khua mua hăng ling tơhan mă bruă amăng sang khuer ƀơi ia rơsĭ, hur har, ĕp hơdră bong glăi hăng hơdôm tơlơi pơmin či ngă sat, pơčuih mă hăng phă pơrai, ngă rung răng amăng dêh čar, yua ƀing ayăt roh mơ̆ng tač rơngiao, ƀudah ƀing pơkơdong glăi bruă kơđi čar amăng lăm, ƀing pơtah hơtai lơ̆m bruă mă, ba truh hơmâo tơlơi pơmin, pran jua kơđi čar soh glăi hăng jơlan hơdră ping gah, tơlơi phiăn kơnuk kơna ta pơkă kơ bruă pơgang dêh čar.

Tal blung a nao jơnum ruah khua ping gah ƀơi sang khuer amăng ia rơsĭ, mơnuih ping gah Phạm Quang Dũng, khul anom bruă ping gah sang khuer amăng rơsĭ DKI/10 brơi thâo:

“Mah mut jơnum hrŏm amăng kual ping gah ƀơi lŏn hang, samơ̆ lơ̆m mut jơnum hrŏm ruah khua blung a ƀơi khul ping gah sang khuer, khă bưp lu tơlơi tơnap tap, kơƀah djop mơta; samơ̆ hơdôm mơnuih ping gah ăt ngă klă bruă jao prăp rơmet, pơphun jơnum djơ̆ hăng tơlơi phiăn pơkă, hăng mông jơnum mơak kơdrưh ăt hrup hăng pơ anih jơnum ƀơi lŏn hang mơ̆n”.

Ataih mơ̆ng lŏn hang, hăng anih dŏ mă bruă tơnap tap, gleh glar, hơmâo bruă mă yom phara, djop gưl anom bruă ping gah amăng sang khuer DKI kiăng thâo hmar, sem hlâo tơlơi pơhing laih anun pơtong bruă mă git gai pơsir hmao kru, wơ̆t bruă tơnap tap hai, phrâo, ƀudah aka ƀu ƀuh djơ̆ ôh hăng bruă ngă gir run pran jua ngă khut khăt, git gai khua mua amăng sang bruă khuer, hrŏm hăng abih bang khom mut hrŏm sa pran jua, sa tơlơi pơmin ngă klă bruă prăp lui truh pơ mông jơnum ruah khua ping gah rơwang bruă thun 2025-2027. Hơdôm boh tơhnal dưi tŭ mă amăng rơwang bruă laih rơgao hăng boh tŭ yua jơnum ruah khua djop boh anih amăng hơdôm sang ngă bruă khuer ƀơi ia rơsĭ DKI lăi pha, tơhan sơlup kual 2 hnun mơ̆n. Anun lĕ tơlơi pơtong rơđah hăng tơlơi đăo kơnang mơ̆ng Ping gah, Kơnuk kơna hăng mơnuih ƀôn sang hăng ƀing tơhan ngă bruă pơgang tơlơi dưi ngă pô amăng guai lŏn ia lơ̆m ia rơsĭ prong tơbung gah Dơnung dêh čar.