Ping gah tơring čar Khánh Hòa phrâo pơphun jơnum pơlăi nao rai kơplah wah Khul djru bruă Ping gah tơring čar hăng ƀing apăn bruă gưl să thun 2026. Jơnum hơmâo tŭ mă 210 tơlơi pơgôp hiăp mơng ƀing apăn bruă, mơnuih mă bruă ƀơi 64 boh să, phương. Hơdôm tơlơi pơgôp hiăp đing nao hơdôm bruă dưm dăp anih anom, mơnuih apăn bruă, hơdră djru brơi, pơplih ngă hră pơ-ar, pơplih mrô hăng prăk yua ngă bruă ƀơi ƀon lan.

Lu ƀon lan lăi pơthâo lu bruă đơi lơm anun mrô mơnuih apăn bruă aka gap ƀrô hăng mrô mơnuih ƀôn sang hăng tơlơi rơkâo bruă jao. Lu phương hơmâo lu mơnuih, kual lŏn mơnai pơprong, bruă pơđĭ kyar plơi pla ƀon lan tañ samơ̆ biên chế aka ƀu pơhlôm djop, ngă mơnuih apăn bruă khŏm ngă lu bruă phara.

Yă Trương Thị Thu Thảo, kơ-iăng Khua anom bruă pơjing Ping gah phương Nam Nha Trang, tơring čar Khánh Hoà brơi thâo, bruă mă jai hrơi lu tui, samơ̆ prăk apah brơi mơnuih apăn bruă hrŏ trun. “Amăng phương hơmâo lu mơnuih apăn bruă pơdơi hăng pơplih anih mă bruă, bruă mă jai hrơi lu tui samơ̆ ƀu hơmâo prăk djru brơi 30% mơng Ping gah dong tah. Tơdơi kơ hrơi blan djă bong lui 6 blan, ră anai prăk apah hrŏ trun lu biă mă, yua bruă mă jai hrơi lu tui, anun ngă lu mơnuih pơplih bruă mă kiăng lăp djơ̆ hăng tơlơi gal amăng sang anŏ”.

Ră anai, Khánh Hòa hơmâo 4 boh phương hơmâo mrô mơnuih rơbêh 100.000 čô hăng rơbêh 10 să, phương hơmâo mrô mơnuih rơbêh 50.000 čô. Lu ƀon lan rơkâo tơring čar đing nao pơhrua dong biên chế brơi hơdôm boh să, phương hơmâo lu mơnuih; laih dong tañ pok pơhai anih mă bruă hăng pơphun ĕp pơmut kiăng plai ƀiă ngă glêh tơnap brơi să. Ơi Phạm Ngọc Hải, Khua git gai Ping gah să Tây Khánh Sơn brơi thâo, bruă mă lu, mơnuih apăn bruă aset, anun ƀon lan kiăng mă yua boh thâo phrâo kah mơng dưi pơhlôm tŭ yua lơm pơsir bruă mă. Samơ̆, tơlơi tơnap tap prong hloh ră anai lĕ kơƀah prăk tuh pơ alin: “Tơdah mơnuih apăn bruă ƀing gơmơi dưi yua hơdôm boh thâo măi mok phrâo anai amra pơhlôm hruaih amăng bruă mă, amra pơkrem hrơi mông, ba glăi tŭ yua amăng pơphô bruă, ngă klă ƀiă dong amăng bruă djru brơi mơnuih ƀôn sang hăng anom bơwih ƀong sĭ mơdrô. Tơlơi yôm hloh lĕ prăk kak kiăng kơ blơi hơdôm phần mềm phun, rơkâo Jơnum min mơnuih ƀon sang tơring čar kah pơpha prăk kak kiăng ƀon lan dưi blơi mă yua, ƀudah tơring čar blơi, tơdơi anun pơpha brơi mơnuih apăn bruă mơng gưl  tơring čar truh pơ gưl să dưi mă yua”.

Tơdơi kơ hmư̆ tơlơi pơgôp hiăp amăng mông jơnum, ơi Trần Phong, Khua git gai Ping gah tơring čar Khánh Hòa rơkâo djop gơnong bruă, sang bruă ječ ameč pơsir hĭ tơlơi tơnap tap tui tơlơi glăm ba, laih dong pơƀut glăi djop tơlơi rơkâo aka dưi pơsir kiăng lăi pơthâo gơnong glông sem lăng pơsir hĭ. “Rơkâo hơdôm gơnong bruă, sang bruă kơtưn amăng gum hrŏm, gơgrong ƀiă dong, pơpha mơnuih apăn bruă kiăo tui lăng ƀơi rĭm boh ƀon lan, tañ thâo tơlơi pơhing, tơlơi gun, hmao tlôn lăi pơthâo brơi Ping gah tơring čar, Jơnum min mơnuih ƀon sang tơring čar. Djop tơlơi lăi glăi kiăng pơhlôm brơi tong ten, mơ-it glăi 64 boh să, phương, kiăng hơmâo tơlơi lăi glăi, dưi hă ƀŭ ? Anăm brơi dŏ tơguăn hlơi dong tah ?”.

Pơđut hĭ jơnum pơlăi nao rai, lu bruă mă mơng tơlơi sit nik amăng ƀon lan ƀơi Khánh Hòa hơmâo lăi nao tơpă, mơng anŏ glêh tơnap mơng bruă mă, kơƀah biên chế, prăk apah hrŏ trun truh pơ tơlơi tơnap kơ prăk kak yua pơplih mrô. Hơdôm tơlơi pơgôp hiăp mơng ƀing apăn bruă, mơnuih mă bruă ƀơi 64 boh să, phương ƀu djơ̆ kơnong pơdah tơlơi kiăng mơnuih apăn bruă ƀơi ƀon lan đôč ôh mơ̆ ăt brơi ƀuh tơlơi rơkâo ječ amăng pơgiong tơhnal pơkă, hơdră djru lăp djơ̆ sit nik mrô mơnuih, bruă pơđĭ kyar plơi pla ƀon lan tañ hăng bruă mă jai hrơi lu tui ră anai. Bruă tơring čar rơkâo pel ĕp glăi, lăi glăi rơđah rơđông hơdôm tơlơi rơkâo ăt čang rơmang amra pơgôp pơsir hĭ tơnap tap, ngă gêh gal brơi ƀing apăn bruă ƀơi ƀon lan hơđong pran jua mă bruă, hrưn đĭ tŭ yua amăng bruă djru brơi mơnuih ƀôn sang hăng anom bơwih ƀong sĭ mơdrô amăng tơring čar Khánh Hòa./.