Tơdơi kơ hmư̆ tơlơi lăi pơthâo hăng pơčrong sai pơgôp hiăp, Khua anom bruă pơ ala mơnuih ƀôn sang dêh čar ơi Trần Thanh Mẫn lăi, 6 blan akŏ thun anai, Ping gah amăng sang bruă khua pơ ala mơnuih ƀôn sang dêh čar ăt hơmâo ngă bruă ƀuh rơđah tơlơi gơgrong ba phun ngă tui tơlơi phiăn mơ̆ng Ping gah, boh nik ñu hră klah čun mơ̆ng Ding jum kơđi čar, Khul apăn bruă git gai ping gah, pơđĭ tui boh tŭ yua amăng bruă čih pơkra tơlơi phiăn, bruă krăp lăng, ngă tui tơlơi phiăn pơtrun, hăng djop mơta hră pơtrun kơ bruă mă yom amăng dêh čar hơmâo ngă djơ̆ lăp soh.

Lăi pơthâo tơlơi aka ƀu găl amăng bruă git gai wai lăng, thun blan rơgao, Khua anom bruă pơ ala mơnuih ƀôn sang dêh čar ơi Trần Thanh Mẫn pơtrun hiăp, 6 blan rơnuč thun, djop sang bruă amăng gơnong bruă pơ ala mơnuih ƀôn sang dêh čar, kiăng pơtum tong ten hloh kơ bruă čih pơkra tơlơi phiăn tui Hră pơtrun mơ̆ng ping gah, biă mă ñu Hră pơtrun mrô 3. Hăng 2 mơta tơlơi pơkă amăng bruă mă, ngă hrŏm Khul git gai ping gah dêh čar, kiăng sem glăi, ngă pơgiong hĭ hơdră git gai brơi hruaih, tŭ yua pơsir djop mơta hră pơtrun, tơlơi hơmâo sit nik rim hrơi. Jơnum anai, ăt pơsit hĭ tơlơi pơkă ngă bruă hrŏm mơ̆ng khul apăn bruă ping gah amăng sang bruă khua pơ ala mơnuih ƀôn sang dêh čar rơwang bruă thun 2025-2030.