Khua dêh čar ơi Phạm Minh Chính pơpŭ hăng lăng yôm hơdôm tơlơi gir run mơng ƀing nai pơtô, pô akŏ lĕ nai pơtô Kim Sang Sik hăng abih bang grup đă boh lông Việt Nam hơmâo găn rơgao tơnap tap, tơlơi lông kiăng dưi mă cup amăng tal pơplông ASEAN Cup 2024 anai, djơ̆ hăng tơlơi čang rơmang mơng mơnuih ƀôn sang Việt Nam, ba glăi tơlơi hing ang kơ lŏn ia ta.

Khua dêh čar pơsit tong, tơlơi dưi anai ƀu djơ̆ kơnong lĕ tơlơi pơ-ư ang mơng bruă pơhlôm bơrơguăt drơi jăn Việt Nam đôč ôh mơ̆ ăt lĕ anŏ pơsur pran jua brơi djop djuai ania, pơdah pran hrưn đĭ hăng dưi tŭ mă hơdôm tơlơi dưi prong ƀiă dong. Amăng mông bưp Khua dêh čar ơi Phạm Minh Chính pơ ala brơi khua mua Ping gah hơmâo jao miđai mă bruă gưl I brơi grup đă boh lông dêh čar Việt Nam. Jao miđai mă bruă gưl III brơi 6 čô mơnuih amăng grup đă boh lông hơmâo Duy Mạnh, Quang Hải, Tiến Linh, Ngọc Đức, Đình Triệu, Nguyễn Xuân Son.