Mông jơnum kiăng pel ĕp, gum pơhiăp bruă mă tơlơi gum pơhiăp mơnuih ƀôn sang hăng ngă giong Rơwang bruă Tơlơi phiăn lŏn drŏn (pơplih pơkra) lăi pơthâo kơ Khua pơ ala mơnuih ƀôn sang hăng bruă tŭ mă tơlơi gum pơhiăp mơng Jơnum min apăn bruă Khua pơ ala mơnuih ƀôn sang pioh kơ rơwang bruă Tơlơi phiăn sang dô̆ (pơplih pơkra). Pơhiăp amăng mông pok phun, Khua dêh čar ta ơi Phạm Minh Chính brơi thâo: Rim blan Kơnuk kơna hmâo sa mông jơnum tui akô̆ bruă kơ čih pơkra tơlơi phiăn, lom anun bôh nik ăt pơplih tañ mơn, tơnap him lăng biă.

Yua anun, Kơnuk kơna khom kiăo tui bôh nik, pơpŭ bôh nik, pok phun mơng bôh nik, mă bôh nik ngă tơhnal pơkă pioh čih pơkra tơlơi phiăn. Hơdôm hrơi rơgao, hơdôm ding jum, gơnong bruă hmâo gơgrong hlâo pel ĕp hơdôm hră pơ-ar tơlơi phiăn, thâo ƀuh hơdôm tơlơi gun, hluai tui anun pơplih pơkra, pơjing, ngă giong tơlơi phiăn kiăng pok phun brơi bruă pơlar đĭ. Khua pơ ala mơnuih ƀôn sang hmâo gum hrom klă laih hăng Kơnuk kơna kiăng pơtlaih tơlơi tơnap, tơlơi gun amăng ngă tui bruă kơđi čar, biă ñu hơdôm tơlơi gun bơdjơ̆ nao mơnuih ƀôn sang, anom bơwih ƀong, hluai tui pran jua pơhlôm tơlơi dưi, bôh tŭ yua djơ̆ phiăn, lăp djơ̆ mơng mơnuih ƀôn sang, anom bơwih ƀong./.