Đĭ pơhiăp amăng mông jơnum, Khua dêh čar ơi Lê Minh Hưng pơsit tong, tơlơi bơwih ƀong huă glăk dong ƀơi anăp kơ tơlơi pơgô̆ kiăng pơplih phrâo hơdră pơđĭ kyar hăng wai lăng hŭi prăk trun nua. Yua anun, djop ding jum, gơnong bruă, gong gai ƀon lan kiăng tŏ tui gơgrong, khut khăt pok pơhai hơdôm hơdră pơsir hĭ tơnap tap, pơtrut bơwih ƀong, sĭ mơdrô hăng jao prăk tuh pơ alin man pơdong. Tui lăi pơthâo, amăng 8 blan rơgao pơhrui ngăn drăp Kơnuk kơna him lăng rơbêh 2 klăk klai prăk; giăm 209 rơbâo klai prăk duh mă jia, prăk duh pơkŏn hơmâo lui hĭ, pơhrŏ trun hăng pơhrơ̆i brơi mơnuih ƀôn sang hăng anom bơwih ƀong sĭ mơdrô. Jao prăk tuh pơ alin man pơdong truh 49% tui mrô pơkă; mrô prăk FDI rơbêh 40 klai đôlar Mi, đĭ 55% pơhmu tui tơđar.

Mrô prăk pơhrui mơng sĭ mơdrô pơ tač rơngiao giăm 770 klai đôlar Mi. Khua dêh čar ơi Lê Minh Hưng rơkâo tŏ tui gơgrong ngă tui hơnong pơkă wai lăng prăk trun nua, pơhlôm hơđông tơlơi bơwih ƀong pok prong, ngă atur pơtrut pơđĭ kyar amăng hơdôm blan rơnuč thun. Ƀing ding kơna Kơnuk kơna đing nao pơsir hĭ tơlơi gun, pơtrut bruă pơđĭ kyar, gir run pơgiong klă hloh hơdôm hơnong pơkă pơđĭ kyar bơwih ƀong huă-mơnuih mơnam thun 2026.