Ƀơi mông jơnum, Khua dêh čar lăi rơđah, man pơdong sang dŏ sĭ mơdrô brơi arăng apah mă, lăp djơ̆ hăng anŏ hơmâo, laih anun brơi apah mă sang dŏ jing sa tơlơi pơtrun prong mơ̆ng Ping gah hăng Kơnuk kơna. Khua dêh čar kiăng pơplih tơlơi pơmin mơ̆ng man pơdong sang pioh sĭ mơdrô jing đĭ kyar sang dŏ či sĭ hăng sang dŏ arăng apah mă hăng prăk, amăng anun sang apah mă či dŏ hơmâo pơsit jing jơlan hơdră akŏ phun, sui thun, bơwih brơi lu mơnuih ƀôn sang, biă ñu lĕ ƀing kông ñơn, mơnuih mă bruă, čơđai sang hră gưl prong, tơhan blah ngă...

Khua dêh čar kiăng ƀôn prong Hà Nội ngă lăng hlâo, ječ ameč lăng glăi abih bang bruă dưm dăp prăp rơmet lŏn či čuk pơkra, man pơdong plơi prong hăng plơi pla...đah mơ̆ng thâo prăp rơmet, đĭ kyar sang dŏ brơi apah mă; gir man pơdong hơdôm kual sang dŏ amăng blan 6 pơ anăp. Ding jum man pơdong ba tơbiă tañ hơdră djru phrâo, hơdră đĭ kyar sang dŏ apah mă, kiăng hơdôm boh tơring man pơdong lu sang dŏ apah mă laih anun Ding jum nao pel ĕp, krăp lăng. Hrŏm hăng anun, Ding jum man pơdong ngă hrŏm hăng hơdôm boh tơring, blung a lĕ Hà Nội, ƀôn prong Hồ Chí Minh, Hải Phòng, Đà Nẵng čih hră lơkak anŏ či kiăng apah mă sang dŏ, či ngă phun atur čuk pơkra, kah pơpha prăk kăk; git gai ngă hrŏm hăng hơdôm ding jum, anom bruă, hơdôm boh tơring sem lăng ba tơbiă rơnoh pơkă rơđah rơđông đĭ kyar sang dŏ apah mă ƀơi đơ đam dêh čar ta, lăi pơthâo hăng Khua dêh čar amăng blan 7/2026./.