Mơguah lơ 11/4, Khua dêh čar ơi Phạm Minh Chính nao ĕp lăng ječ ameč bruă ngă tui Hră pơtrun 30 mơ̆ng kơnuk kơna pơtrun kơ bruă blơi ia jrao, gơnam yua gah ia jrao hăng Hră pơtrun mrô 07 kơ bruă wai lăng gơnam yua gah ia jrao amăng sang ia jrao prong Bạch Mai, Sang ia jrao pơjrao čơđai muai hăng sang ia jrao Đông Anh, sang ia jrao tơlơi ruă Nhiệt đới ƀơi Hà Nội.

Khua dêh čar lăi, Ping gah, kơnuk kơna đing nao biă mă tơlơi suaih pral mơnuih ƀôn sang, tơdơi kơ ƀuh lu anih kơƀah ia jrao, gơnam yua pơjrao duăm ruă hơmâo pơsir hmao kru laih; pơtă pơtăn kơ ƀing ơi ia jrao hăng mơnuih ruă hơđong pran jua pơjrao kiăng tañ hlao. Lăi nao kơ anih dŏ, pơjrao mơnuih duam ruă, Khua dêh čar lăi lĕ, lŏn ia ta hlăk pơđĭ kyar, gơnam yua mă bruă, anih dŏ pơjrao aka ƀu djop đơi ôh, tui hăng anŏ kiăng, samơ̆ ăt pơsir tui ƀơ ƀrư̆.

Boh nik ñu sang ia jrao pơjrao čơđai muai dêh čar, aka djop gơnam yua mă bruă kiăng brơi dŏ pơčlah phara mơnuih ruă hăng pô sang mơnuih ruă dŏ; rơkâo kơ ƀing ngă bruă amăng sang ia jrao hăng mơnuih duam ruă djru nao rai, ngă gêh găl klă hloh pơjrao hăng lăng ba mơnuih duam ruă klă, huăi ngă tơnap nao rai tơdruă.