Amăng mông h’ŭ hăng pran jua pơpŭ, ol kơdol ai hơtai, Grup hyu mă bruă mơ̆ng gơnong dlông hơmâo pioh sa mơnit kup akŏ h’ŭ kơ 192 čô mơnuih khin  hơtai djai drơi yua kơ lŏn ia, dŏ đih glăi ƀơi pơsat anun. Khua dêh čar hăng grup hyu mă bruă hơdor bơni dơlăm biă mă hăng hơdor tơngia na nao mơ̆ng pran jua tuh drah pơčah asar ƀing tơhan djai drơi yua kơ lŏn ia, yua bruă hơkrŭ hăng yua tơlơi hing ang kơ ping gah, djuai ania ta.

Djă kơjăp tơlơi pơtô gru grua hiam mơ̆ng djuai ania ta “Ƀong boh hơdor kơ pô pla”, ngă bruă “Hơdor tơngia tla pran”, Ping gah, Kơnuk kơna hăng Mơnuih ƀôn sang ta pioh na nao tơlơi đing ba, djru hrŏm yom pơphăn hăng mơnuih hơmâo ngă bruă hơkrŭ kơ lŏn ia; ƀu pơdơi ôh djru ba kiăng tơlơi hơdip mơda, bruă mă pơtrut pran jua ƀing tơhan rơka rơkač, sang anŏ hơmâo mơnuih djai drơi yua kơ lŏn ia dưi hơđong; laih dơ̆ng ăt pơtrut hăng pơlar tui pran jua thâo khăp kơ lŏn ia, pơpŭ tui tơlơi pơmin pran jua ngă hơkrŭ, pơtrut pơsur bruă ngă tuh rơyuh pran jua man pơdong hăng pơgang lŏn ia kơjăp kơtang tui amăng djop rơnuk mơ̆ng hlâo truh ră anai, dĭ da gla kơñ hnun mơ̆n.