Lơ 8/6, tơdơi kơ jơnum ngă lơphet lơ 8/6, čơkă sit nik ƀơi Sang bruă kơnuk kơna, Khua dêh čar ơi Lê Minh Hưng hăng Khua dêh čar Thai Lan, ơi Anutin Charnvirakul bơkơtuai nao rai. Dua čô khua dêh čar pơdah pran jua hơ̆k mơak ƀuh tơlơi pơđĭ kyar hiam hăng kơtang hloh tơlơi rô nao rai ngă pŭ ƀăn, giăng mah Việt Nam-Thai Lan amăng 50 thun laih rơgao, yap mơ̆ng hrơi akŏ pơjing bruă ngă giăng mah pơtom hiăp thun 1976; lăng yom bruă rô nao rai dua bơnah hlăk amăng črăn pơđĭ kyar hiam klă hloh mơ̆ng hlâo truh ră anai, hăng atur kơ tơlơi đăo kơnang tong ten gah bruă kơđi čar kơjăp, ngă hrŏm bơwih ƀong huă beč bal laih anun jĕ giăm mơnuih ƀôn sang dua bơnah.

Amăng tơlơi bơwih ƀong huă, dua bơnah khua mua dêh čar bơtŭ ư pơđĭ kyar tŭ yua tui jơlan hơdră anăn “Klâo pơtruh nao rai”, pơtrut bruă čuk jơlan dưi pơhluh nao rai dua bơnah, logistics, jơlan rơdêh por hăng tuai čuă ngui; kơsem min čuk pơkra jơlan rơdêh nao rai ƀơi dua boh dêh čar, jơlan ia rơsĭ, ia krông pơtruh nao rai amăng kual ia krông Mekong; pơđĭ tui boh tơhnal ngă tui tơlơi phiăn pơkă mơ̆ng Jơnum min sĭ mơdrô plah wah Việt Nam-Thai Lan; pơsir hĭ tơlơi ngă gun bruă sĭ mơdrô nao rai, kiăng ngă amuñ brơi gơnam sĭ mơdrô dua bơnah dưi sĭ mơdrô hrŏm hơbit ƀơi anom sĭ mơdrô dua boh dêh čar; gir run kiăng pơhrui glăi prăk sĭ mơdrô truh 25 klai USD hăng kơtưn sĭ mơdrô pơhrui truh mrô 50 klai USD, anăp nao ngă bơkơnar laih anun hơđong. Dua čô khua tă bơlăi pơtong, pok pơhai tŭ yua bruă ngă hrŏm hơmâo pơkôl pơkă, ba tơlơi ngă giăng mah yom phara hăng hlom bom plah wah Việt Nam-Thai Lan pơđĭ kyar kơjăp laih anun dơlăm hloh, djru hrŏm ngă hơđong nua, gơnam sĭ mơdrô, hơdai gum hrŏm pơđĭ kyar amăng kual.