Khua dêh čar brơi thâo, kiăng ngă hơbôt hloh khul mơnuih apăn bruă hăng tŭ ư sa anih git gai phun, Kơnuk kơna pơphun glăi Khul git gai pơčrâo bruă, jing Khul hrŏm, pơpha bruă mă ngă tui 4 jơlan hơdră mơ̆ng dêh čar djru kah hăng (Man pơdong plơi pla phrâo;pơđĭ kyar bơwih ƀong huă-mơnuih mơnam kual djuai ƀiă hăng čư̆ siăng; Pơđĭ kyar gru grua hiam, Wai pơgang tơlơi suaih pral, mrô mơnuih hăng pơđĭ kyar laih anun pơblih phrâo, pơđĭ tui boh tŭ yua pơtô hăng pơjuăt).

Kơnong jơlan hơdră mơ̆ng dêh čar djru kơ bruă pơhlom hlâo, pơgăn ma túy yua Ding jum kông an git gai ngă tui. Khua dêh čar pơtrun hiăp brơi hơmâo hơdră pơblih hmar hloh, pơsir hĭ anŏ kaih mă yua prăk, biă mă rơnoh prăk tuh pơ alin amăng thun 2026 hăng črăn mơ̆ng thun 2021-2025, pioh glăi sui truh thun 2026. Laih dơ̆ng, djop sang bruă pơpha bruă mă hơmâo Ding jum ngă hmua hăng ayuh hyiăng, Ding jum Djuai ania hăng Tơlơi đăo kiăng ngă hrŏm tong ten hloh hăng Ding jum Pơtô hăng pơjuăt, Ding jum gru grua, Pơrơguăt drơi jăn hăng Tuai čuă ngui pioh pok pơhai sa amăng plĕ djop jơlan hơdră anai, kiăng pơhlom khom ngă giong djơ̆ tơhnal pơkă.