Ƀơi mông bưp, Khua dêh čar lăi rơđah, amăng tal nao čuă sit nik dêh čar Nga hăng pơhmư̆ mông ngă lơphet 80 thun Hrơi blah rơngai amăng Rơnuk blah ngă pơgang lŏn ia hing ang mơ̆ng Khua git gai ping gah ơi Tô Lâm (blan 5/2025), Khua mua prong hloh dua boh dêh čar hơmâo tơlơi pơmin hrŏm laih anun gir pơđĭ tui tơlơi ngă hrŏm klă kơ dua bơnah amăng djŏp bruă mă, lăp djơ̆ hăng tơlơi kiăng mơ̆ng rơnuk đĭ kyar phrâo.

Khua dêh čar đăo kơnang pơ anăp, Cộng hòa Tatarstan amra ĕp ƀuh anih anom pơ tơring čar Việt Nam lăp djơ̆ či akŏ pơdong tơlơi ngă hrŏm, ĕp tơlơi gêh găl ngă hrŏm amăng hơdôm bruă dua bơnah dưi ngă hloh, kiăng hloh kah hăng bơwih ƀong - sĭ mơdrô, pơtô hăng pơjuăt, čơkă tuai hyu ngui, gru grua. Laih dong pơtrut pơsur hơdôm boh kông ti rơdêh por dua boh dêh čar lăp đing nao akŏ pơdong thim jơlan rơdêh por pơgiăng tuai pơtruh Kazan hăng Hà Nội.