Hăng akŏ tơlơi jơnum “Bruă ngă giăng mah hăng bơnah ƀu hơmâo pơkă guai”, jơnum pơčrong sai tal anai hơmâo pă wơ̆t bơkơtuai nao rai tong ten lăi nao bruă ngă hrŏm kơsem min boh thâo ia rơgơi phrâo hăng Boh thâo ia rơgơi ană mơnuih pơjing rai AI, ƀu pơkă guai dêh čar: Kah hăng boh thâo ia rơgơi gah prăk kăk hăng ƀôn prong phrâo rơgơi; Sĭ mơdrô hăng jar kmar; Pơhlom djop mơnong ƀong huă hơđong, bruă pơdŭ pơgiăng hăng pơtruh nao rai logistics plah wah Nga hăng djop dêh čar ASEAN; ngă hrŏm gah bruă apui yua, jơlan glông nao rai hăng tuh tia pơkra ming; lu hơbô̆ bruă jĕ giăm nao rai amăng kơnuk kơna-tơlơi đăo ƀơi dêh čar Nga hăng ASEAN.

Amăng tơlơi đĭ pơhiăp, Khua dêh čar ơi Lê Minh Hưng hơmâo lăi pơthâo 3 mơta bruă kiăng anăp nao ngă hrŏm phun tơdơi adih. Khua dêh čar rơkâo ASEAN hăng Nga kiăng pơtrut lu jơlan hơdră ngă hrŏm pơblih phrâo, djru sang bruă mơdrô boh thâo ia rơgơi tơlơi pơhing hăng ƀing ngă bruă mơdrô thun hlăk ai ngă khua, akŏ pơjing khul mơnuih mă bruă thâo pơčeh phrâo beč bal, hmar hloh, pơtruh nao rai tong ten kơ dua bơnah. Khua dêh čar lăi, Việt Nam amra ngă pô gơgrong ba gong jơlan, pơtrut bruă sĭ mơdrô, tuh pơ alin plah wah ASEAN hăng Nga, mơ̆ng anun kiăng ba yua anŏ gêh găl, pơjing rai bruă ngă tum teč rơđah rơđong, ĕp anih anom sĭ mơdrô hăng pơjing pran jua đăo kơnang nao rai jing pran kơtang phrâo.