Jơnum hơmâo pơčrông sai, pơgôp hiăp hăng črăn tơhnal pơkă kơ bruă mă mơng Ping gah Kơnuk kơna, tơhnal pơkă bruă mă mơng Jơnum min pel ĕp, jơlan hơdră pel ĕp, krăo lăng thun 2026 hăng amăng ha rơwang mă bruă. Pơđut mông jơnum, Khua dêh čar lăi pơtong tơhnal pơkă bruă mă kiăng pơdah tong ten pran pơplih phrâo, kah gưl, jao bruă pơlir hăng tơlơi glăm ba tong ten mơng rĭm khul grup, rĭm čô mơnuih; pơtrut kơtang amăng pơplih ngă hră pơ-ar, hrŏ ƀiă hră pơ-ar hăng pơplih mrô kiăng hrưn đĭ klă amăng bruă mă, ba glăi tŭ yua.

Hăng bruă jao pơ anăp, Khua dêh čar rơkâo kiăng pel ĕp na nao, kiăo tui lăng boh than ba glăi lơm ngă tui jơlan hơdră, akŏ bruă; ngă tui hơdôm bruă jao brơi djơ̆ hrơi mông hăng pơhlôm klă hloh, laih dong kơtưn pel ĕp, krăo lăng, pơhlôm hơdôm tơlơi pơtrun, jơlan hơdră bruă mă hơmâo pok pơhai tŭ yua.