Dua čô khua pơsit tong Việt Nam hăng Timor-Leste hơmâo lu tơlơi dưi kiăng pok prong ngă hrŏm yua kơ tơlơi dưi mơng mơnuih ƀôn sang dua boh dêh čar hăng pơgôp brơi tơlơi rơnuk rơnua, pơđĭ kyar hơđong kjăp amăng kual. Dua bơnah bơtŭ ư tŏ tui hơkrŭ pran đăo gơnang bruă kơđi čar, kơtưn pơbưp nao rai khua mua pơprong, pok pơhai tŭ yua hơdôm tơlơi pơkôl hơmâo ngă. Kơ tơlơi bơwih ƀong huă, dua boh dêh čar amra pơtrut tañ bruă tŭ yap hăng ngă tui tơlơi pơkôl sĭ mơdrô dua bơnah, laih dong pok prong ngă hrŏm amăng hơdôm bruă anun lĕ braih apiăng, gơnam đang hmua, akan hơdang, čoh sum ao, dăng kông, pơplih mrô, anih anom hăng bơwih bơwang.

Khua dêh čar Timor-Leste rơkâo Việt Nam tŏ tui ba sĭ mơdrô hơdôm gơnam hơmâo lu hloh, sit biă ñu braih apiăng, pơgôp pơhlôm djop mơnong ƀong huă brơi dêh čar anai. Dua bơnah ăt bơtŭ ư kơtưn ngă hrŏm amăng bruă ling tơhan, pơtô pơjuăt, pơtô brơi mơnuih mă bruă, gru grua, tuai čuă ngui, bơrơguăt drơi jăn hăng pơlăi nao rai tơlơi găn rơgao amăng ngă hmua hơđong kjăp.