Nao ƀơk gơnam jao brơi tơl tongan rim tơhan duăm ruă, rơka rơkač, Khua dêh čar ơi Lê Minh Hưng pơdah pran jua ol kơdol biă mă hăng mơ-it hiăp tơña bla, hơdor tơngia prong prin hăng abih bang khul tơhan rơka rơkač, duăm ruă, mơnuih hơmâo ngă bruă djru hơkrŭ kơ lŏn ia amăng dêh čar. Khua dêh čar lăi pơtong, thâo hluh dơlăm tơlơi pơtô mơ̆ng djuai ania “Ƀong boh hơdor kơ pô pla” laih anun tơlơi Khua mir sir Hồ Chí Minh pơtô, amăng 79 thun laih rơgao, Ping gah hăng kơnuk kơna đing nao, ngă tui djop jơlan hơdră klă hloh pioh kơ bruă hơdor tơngia tla pran.

Lu jơlan hơdră djru ba jai hrơi djop hloh, khul tŭ mă tơlơi djru ăt pok prong, lu tui mơ̆n. Bruă ngă “Abih bang mơnuih ƀôn sang wai lăng djru ba sang anŏ ƀing tơhan rơka rơkač hăng mơnuih djai pơsăn drơi jăn yua kơ lŏn ia hăng sang anŏ ngă hơkrŭ” hơmâo bang hyu kơtang, bơngač hloh, tŭ mă lu tơlơi dong yua, djru hrŏm mơ̆ng abih bang mơnuih mơnam amăng dêh čar. Tơlơi khăp hăng pơpŭ gơgrong ba anun hơmâo pơjing rai sa bruă ngă hiam dŏ dong ƀong huă thâo hơdor tơngia, bơni hiam amăng mơnuih mơnam, anun jing gru grua, bruă ngă thâo khăp pap dơlăm biă mă, djă tŏ tui bruă hiam mơ̆ng djuai ania ta. Khua dêh čar lăi pơtong: Pran jua khin hơtai hăng tơlơi pơmin pơsăn drơi pô mơ̆ng ƀing tơhan rơka rơkač, ƀing tơhan duăm ruă ƀuh rơđah tơlơi khin hơtai kơ bruă hơkrŭ, anih tơki pran jua tơlơi kơjăp, đăo kơnang kơ glông bruă kơđi čar amăng bruă pơblih phrâo lŏn ia ră anai.