Bơni kơ yă Jennifer Wicks dưi ruah ngă khua anih jưh pơ ala dêh čar Mi ƀơi Việt Nam, Khua dêh čar ta mơ-it hiăp tơña bla kơ Khua mir sir dêh čar Mi, ơi Donald Trump hăng pơpŭ kơ kơnuk kơna laih anun mơnuih ƀôn sang dêh čar Mi hơ̆k mơak hrŏm ƀrô hơdor glăi tal 250 thun hrơi akŏ pơdong kơnuk kơna lŏn ia.

Khua dêh čar lăi, Việt Nam lăng kơ dêh čar Mi sa amăng hơdôm bơnah ngă hrŏm mrô sa; dong yua dêh čar Mi ngă pô gơgrong ba prong amăng bruă pơsir tơlơi rơnuk rơnua, hơđong hăng mơak hlak amăng kual laih anun ƀơi jar kmar. Khua dêh čar lăi lĕ, dua bơnah kiăng pơtrut lu hloh amăng bruă ngă hrŏm bơwih ƀong huă sĭ mơdrô anăp nao bơkơnar hăng hơđong kơjăp dua bơnah lêng kơ hơmâo boh tŭ yua soh; tañ pơsir hĭ hơdôm tơlơi ngă gun hăng pơgiong bruă bơkơtuai nao rai kĭ Hră pokôl sĭ mơdrô bơkơnar pioh kơ sang bruă mơdrô dua bơnah tuh pơ alin lu hloh, pơkra ming gơnam sĭ mơdrô.

Khua anih jưh pơ ala dêh čar Mi, yă Jennifer Wicks brơi thâo, dêh čar Mi ăt lăng yom bruă ngă giăng mah rô nao rai hăng Việt Nam; hăng boh pơhiăp kiăng lăi pơthâo “Hơ̆k mơak biă mă jing bơnah ngă hrŏm Việt Nam” hrŏm hăng tơlơi bơni glăi mơ̆ng Khua mir sir ơi Donald Trump hăng Khua ding jum pơtom hiăp ơi Marco Rubio mơ-it kơ abih bang khua mua Việt Nam hơmâo pơpŭ hăng bơni hơ-ơč ƀrô hơdor glăi tal 250 thun hrơi akŏ pơdong kơnuk kơna lŏn ia Mi. Khua anih jưh pơ ala ăt lăi pơtong bruă ngă hrŏm bơwih ƀong huă-sĭ mơdrô yơh jing bruă đing nao hlâo hloh amăng rơwang bruă ñu ngă khua anih jưh pơ ala ƀơi Việt Nam. Ñu čang rơmang dua bơnah ăt djă bong kơjăp bruă pơblih nao rai tañ kiăng tŭ ư kĭ pơkôl djơ̆ rơnoh pơkă dlông hloh, pơkă brơi dua bơnah bơkơnar, mơ̆ng anun ngă brơi anŏ gêh găl djru tuh pơ alin bơwih ƀong huă kơ dua bơnah dêh čar.