Tŭ jum Khua anih jưh pơ ala dêh čar Canada, Khua dêh čar ta pơsit, Việt Nam lăng Canada jing gŏp ngă hrŏm yom laih anun kiăng pơđĭ tui hloh tơlơi rô nao rai ngă gŏp hlom bom abih bang bruă jai hrơi kjăp tui, kiăng tañ ba tơlơi ngă hrŏm anai prong hloh dong. Khua dêh čar kiăng Canada pok bah amăng brơi djŏp mơta gơnam mơ̆ng Việt Nam dưi ba sĭ, biă ñu lĕ gơnam mơ̆ng hmua, kyâo, akan hơdang; ngă hrŏm pơtô pơjuăt mơnuih mă bruă gah boh thâo yom. Dua bơnah ngă hrŏm kjăp hloh, tŭ yua, djru nao rai tơdruă ƀơi hơdôm khul grup, mông jơnum amăng kual laih anun jar kmar, biă ñu amăng Hră kĭ pơkôl gŏp ngă hrŏm abih bang hăng pơplih rơgơi hloh (CPTPP) mơ̆ Việt Nam ngă Khua git gai thun 2026 laih anun Jơnum ngă hrŏm bơwih ƀong kual ASIA - Thái Bình Dương (APEC) mơ̆ Việt Nam ngă Khua thun 2027.

Tŭ jum Khua anih jưh pơ ala dêh čar Hàn Quốc, Khua dêh čar pơsit, Kơnuk kơna Việt Nam amra ngă gêh găl brơi hơdôm anom mơdrô mơ̆ng čar rơngiao, amăng anun hơmâo anom bơwih ƀong Hàn Quốc hơđong pran tuh pơ alin hơđong hăng sui thun ƀơi Việt Nam. Ñu kiăng dua bơnah pơtrut ngă hrŏm gru grua laih anun djru Việt Nam đĭ kyar boh thâo ia rơgơi gah gru grua; pok prong pơbưp mơnuih ƀôn sang hăng bruă čơkă mơnuih mă bruă mơ̆ng Việt Nam nao pơ Hàn Quốc mă bruă.

Tŭ jum Khua anih jưh pơ ala dêh čar Australia, Khua dêh čar ơi Lê Minh Hưng hok mơak biă lơ̆m 6 mơta bruă akŏ phun amăng jơlan hơdră Ngă bruă pok pơhai rô nao rai ngă gŏp yom abih bang Việt Nam - Australia rơwang thun 2024-2027 leng kơ hơmâo pok pơhai djơ̆ hrơi pơkă, truh ră anai hơmâo ngă giong laih 96%. Lăi dlăm dua boh dêh čar dŏ hơmâo lu anih či ngă hrŏm, Khua dêh čar kiăng dua bơnah pok pơhai ngă djơ̆ hăng rơnoh kiăng pơhrui prăk sĭ mơdrô truh kơ 20 klai USD laih anun đĭ dua wơ̆t tuh pơ alin dua bơnah pơ anăp anai./.