Amăng mông bơkơtuai, Khua dêh čar ơi Phạm Minh Chính pơtŏng sit, tal rai čuă mơ̆ng Khua dêh čar Kyrgyzstan jing pơđom pioh gru grua yôm phăn, pok tơbiă rơwang gum hrŏm phrâo kơ tơlơi rô nao rai giăng mah mơ̆ng hlâo kơplah wah Việt Nam hăng Kyrgyzstan, anăp nao pơđĭ tui tơlơi rô nao rai truh rơnoh Gum hrŏm abih bang.

Dua gơñu pơtŏng sit tơhnal yôm phăn mơ̆ng bruă djă pioh pơbưp hơdôm gưl, biă ñu lĕ gưl dlông, hluai tui abih bang hơdôm glông jơlan, ăt kah hăng kơplah wah hơdôm Ding jum, gơnong bruă, tơring čar, ƀôn prong, amăng anun hmâo wot pơbưp dua bơnah ƀơi hơdôm mông bơkơtuai, jơnum jar kơmar, biă ñu ƀơi Sang gum hơbit djop dêh čar; anăp nao pơjing hơdôm jơlan lăi pơthâo nao rai ƀơi anăp pioh pơtrut ba glăi bôh tơhnal hơdôm tơlơi pơkôl gưl dlông dưi hmâo. Khua dêh čar ơi Phạm Minh Chính pơtŏng sit Việt Nam amra ngă pô tô nao rai pioh Kyrgyzstan kơtưn gum hrŏm hăng ASEAN, čang rơmang Kyrgyzstan ngă tui bruă mă hăng tô nao rai Việt Nam hăng kual Tŏng Krah ASIA; rơkâo Kyrgyzstan dŏng yua tơlơi pơmin mơ̆ng Việt Nam hăng ASEAN amăng tơlơi Ia Rơsĭ Ngŏ./.