Amăng mông bưp Khua anih jưh pơ ala dêh čar Malaysia, Khua dêh čar ơi Phạm Minh Chính hok mơ-ak čơkă ơi Dato Tan Yang Thai rai mă bruă ƀơi Việt Nam hăng čang rơmang rơwang thun mă bruă mơng gơñu, Khua anih jưh amra ngă tui pran gơgrong lĕ mơnuih ngă gong jơlan kiăng pơtrut tơlơi rô nao rai tŏ tui pơđĭ kyar jai hrơi dơlăm hăng tŭ yua. Amăng mông bưp Khua anih jưh pơ ala dêh čar Kur ƀơi Việt Nam, Khua dêh čar ơi Phạm Minh Chính hơmâo pơpŭ yă Chea Kimtha hơmâo ruah ngă Khua anih jưh đah kơmơi blung a dêh čar Kur ƀơi Việt Nam; pơpŭ hơdôm tơlơi truh kih amăng bruă lŏn ia hăng pơtom hiăp mơ̆ Kur dưi ngă amăng hrơi blan laih rơgao.

Khua dêh čar čang rơmang Kur amra pơphun truh kih tal plĕ hră ruah Khua pơ ala mơnuih ƀon sang dêh čar tal VII hăng pơplông bơrơguăt drơi jăn kual Đông Nam Á tal 32, pơsit tong Việt Nam amra dong yua, pơlăi nao rai tơlơi găn rơgao kiăng Kur pơphun truh kih tal pơplông bơrơguăt drơi jăn yôm phăn anai. Khua dêh čar rơkâo dua bơnah tŏ tui gir run bơkơtuai pơsir hĭ 16% mrô glông jơlan guai aka ƀu pŏng gong guai kiăng pơjing jơlan guai rơnuk rơnua, giang mah, ngă hrŏm hăng pơđĭ kyar; Laih dong rơkâo gah dêh čar Kur tŏ tui gir run, ngă hră pơ-ar djơ̆ tơlơi phiăn brơi mơnuih ƀon sang Việt Nam pơ dêh čar Kur, ngă gêh gal brơi mơnuih ƀon sang Việt Nam pơ dêh čar Kur dưi bơwih ƀong, hơđong tơlơi hơdip mơda ƀơi Kur.