Amăng mông bưp, Khua dêh čar ơi Phạm Minh Chính pơpŭ dêh čar Lao hơmâo pơphun truh kih Jơnum khul ia krông jar kmar tal 4, mơng anun pơgôp hrưn đĭ kơdrưh ang mơng dêh čar Lao amăng kual. Dua čô khua hok mơ-ak hăng lăng yôm bruă pơđĭ kyar hiam klă tơlơi rô nao rai giang mah yôm phăn, gum pơgôp hăng ngă hrŏm djop mơta Việt Nam-Lao amăng djop bruă dua bơnah ngă hrŏm amăng thun blan laih rơgao.

Sit biă ñu, ngă hrŏm sĭ mơdrô lĕ ba jơlan hlâo hăng rơnoh pơhrui amăng thun 2022 dưm dưm rơbêh 1 klai 700 klăk đôlar Mi, đĭ rơbêh 24% pơhmu hăng thun 2021. Dua bơnah tŭ ư gir run pok pơhai tơlơi pơkôl ngă hrŏm Việt Nam -Lao rơwang thun 2021-2030, tơlơi pơkôl ngă hrŏm dua bơnah Việt Nam-Lao rơwang thun 2021-2023 hăng hơdôm tơlơi pơkôl, akŏ bruă ngă hrŏm hơmâo kĭ amăng djop mơta bruă; tŏ tui gum hrŏm pơhlôm rơnuk rơnua, hơđong tơlơi hơdip; kơtưn ngă hrŏm wai pơgang. Dua bơnah tŭ ư tŏ tui hrưn đĭ ngă hrŏm bơwih ƀong huă; djru tơdruă hơkrŭ glăi tơdơi kơ abih klin, pơjing tơlơi bơwih ƀong rơngai, ngă pô, pơlir hăng bruă mut hrŏm jar kmar sit nik, dơlăm hăng tŭ yua.