Khua dêh čar ơi Phạm Minh Chính lăi pơtong, tal nao čuă jơmư dêh čar Australia mơ̆ng grup khua mua kơnuk kơna Việt Nam anai yôm pơphăn biă mă, ñu pơdah rai tơlơi čang rơmang kiăng hrŏm hăng Australia ngă kjăp tui laih anun dơlăm hloh tơlơi ngă giăng mah dua bơnah dêh čar, ăt kah hăng kơtưn bruă rô nao rai tong ten plah wah anom bruă khua pơ ala mơnuih ƀôn sang dêh čar Việt Nam hăng Australia, djru hrŏm pok pơhai ngă tui tơlơi pơkôl phrâo pơ anăp adih. Dua čô khua tŭ ư hrŏm hruă kjăp tui bruă pơtom hiăp mơnuih ƀôn sang, ngă hrŏm pơgang anŏ răm ƀăm yua pơblih ayuh hyiăng lŏn tơnah, pok jơlan rơdêh por nao rai lu hloh, wơ̆t hăng bruă ngă hrŏm pơtô pơhrăm, tuai čuă ngui. Ƀrô tal anai, Khua dêh čar ta ơi Phạm Minh Chính čang rơmang anom bruă khua pơ ala mơnuih ƀôn sang dêh čar Australia ăt ngă gêh găl kơ mơnuih ƀôn sang Việt Nam djru hrŏm bruă pơđĭ kyar ƀơi dêh čar Australia hăng bruă ngă giăng mah dua bơnah dêh čar.

Ăt amăng hơdră nao čuă jơmư anai mơ̆n, Khua dêh čar ta ơi Phạm Minh Chính hơmâo tŭ jum Khua ping gah Rơngai dêh čar Australia, ơi Peter Dutton. Ƀơi mông tŭ jum, dua čô khua tŭ ư kơtưn brơi grup khua mua dua bơnah bưp nao rai, pơtrut bruă pơtom hiăp ping gah hăng mơnuih ƀôn sang hnun mơ̆n, ngă pơ amuñ brơi mông jơnum grup khua mua ngă giăng mah dua bơnah, pơphun lu bruă mă gru grua, pơrơguăt drơi jăn, djru tơlơi khăp pap...