Ƀơi mông bưp, dua čô khua dêh čar tŭ ư lăng yôm bruă giăng mah rô nao rai hing ang, gum pơgôp yôm phara hăng ngă hrŏm djop mơta plah wah Việt Nam hăng Lao, ăt pơđĭ kyar klă hiam, hơđong kjăp laih anun tŭ yua djop bruă thun blan rơgao. Bruă ngă hrŏm bơwih ƀong huă, sĭ mơdrô, tuh pơ alin ăt pơtrut ngă tui hăng hơmâo lu boh tơhnal pơblih klă tŭ yua. Sĭ mơdrô dua bơnah amăng klâo blan tal I thun 2024 pơhrui glăi truh 476,8 klăk USD, đĭ tui 12% pơkă hăng tal anai thun hlâo. Bruă ngă hrŏm pơtô pơhrăm, gru grua, boh thâo ia rơgơi, tuai čuă ngui hăng jĕ giăm rô nao rai mơnuih ƀôn sang ăt pok pơhư tui djơ̆ anăp mă bruă pơđĭ tui boh tŭ yua lu hloh.

Ƀrô tal anai, dua čô khua hrŏm hơbit pơčrong sai nao rai hơdră ngă rơđah rơđong tum teč hloh, kiăng ngă djơ̆ tơlơi pơkôl pơkă mơ̆ng khua mua pơprong laih anun boh tơhnal mơ̆ng jơnum tal 46 Jơnum min ngă hrŏm dua bơnah kơnuk kơna dêh čar Việt Nam-Lao. Dua bơnah tŭ ư kơtưn pơtruh nao rai tơlơi bơwih ƀong huă, boh nik ñu tơlơi phiăn mă bruă, prăk kăk, jơlan glông nao rai, apui yua, dăng kông, tuai čuă ngui; djru tơdruă akŏ pơdong lŏn ia rơngai, ngă khua pô, lir hơbit hăng bruă pơphun mut hrŏm jar kmar prong hloh, dơlăm tui hăng tŭ yua. Dua čô khua tŭ ư ngă hrŏm tong ten, dong yua tơdruă amăng mông jơnum jar kmar, amăng kual ASEAN, Sang gum hơbit djop dêh čar hăng tui tơlơi pơtrun amăng kual ia krông Mekong. Khua dêh čar ơi Phạm Minh Chính lăi, Việt Nam ăt dong yua hăng djru dêh čar Lao ngă khua glăm ba truh kih amăng bruă jar kmar thun 2024, amăng anun bruă ngă khua kual ASEAN.