Pơhiăp ƀơi mông čơkă jum, Khua dêh čar ơi Phạm Minh Chính pơdah pran jua đăo kơnang tal rai čuă jơmư anai tŭ yua hiam klă, pơjing rai sa pran phrâo pơtrut bruă ngă giăng mah gru grua laih anun hơdai gum hrŏm Việt Nam-Phần Lan tong ten hloh. Khua dêh čar lăi pơthâo kơ jơlan hơdră pơtom hiăp ăt kah hăng hơdôm jơlan hơdră, tơlơi pơtrun hăng boh tơhnal pơđĭ kyar bơwih ƀong huă mơnuih mơnam mơ̆ng Việt Nam; rơkâo khua pơ ala mơnuih ƀôn sang dêh čar Phần Lan dong yua bruă Jơnum min kual Mi kô̆ EC tañ lui hĭ kak kơñĭ IUU hăng mơnong akan hơdang mơ̆ng Việt Nam; pơtrut ƀing pơ ala mơnuih ƀôn sang djop dêh čar ding kơna EU tañ pơsit brơi Hră pơkôl pơgang bruă tuh pơ alin kơ Việt Nam-khul pơlir hơbit kual Mi kô̆ EVIPA laih anun đăo kơnang hră pơkôl EVIPA amra djru kơ anom bruă sĭ mơdrô mơ̆ng rim boh dêh čar dưi nao giăm anih anom sĭ mơdrô tơdruă hăng amăng kual.

Khua dêh čar ơi Phạm Minh Chính ăt rơkâo dua bơnah kơsem min anŏ gêh găl či ngă hrŏm amăng bruă pơtô hrăm bruă mă, kah pơpha nao rai akŏ pơdong sang hră pơtô pơhrăm thâo rơgơi, ngă gêh găl brơi kơ mơnuih ƀôn sang Việt Nam dŏ mă bruă, hrăm hră hăng bơwih ƀong huă hơđong ƀơi dêh čar Phần Lan, djru pơđĭ tui tơlơi glăm ba ngă pô pơtruh nao rai giăng mah hăng ngă hrŏm dua bơnah dêh čar.